EL CABARÉ DE LA VIDA

DE NENU repunábenme los musicales, o cómo yo los llamaba, "les películes de cantar". Quiciabes ello fuera porque nun-yos topaba sentíu nengún a qu'en mitá d'una escena, les actrices y actores se punxeran a cantar y a baillar asina a lo manolino. Los mios esquemes frayáronse a los 13 años,  cuando una nueche d'un sábadu d'aquel tiempu en que namás había una cadena de televisión con dos canales, prendo la tele pa ver "Sábado Cine". Pasaben "Cabaret", un musical por escelencia, véola hasta'l final y hasta m'alcuerdo que me prestó non sólo la película sinón tamién la banda sonora. 

CABARET YE UNA PELÍCULA de 1972, dirixida por Bob Fosse y protagonizada por Liza Minelli, Michael York y Joel Grey, una versión llibre del musical del mesmu nome estrenáu en 1.966 de John Kander y Fred Ebb qu'al mesmu tiempu ta inspiráu na novela "Good bye to Berlín", 1939, de Cristopher Isherwood. La película foi un ésitu de taquilla y ganó 8 estatuines de Hollywood  ente los que ta l'Oscar a la meyor actriz, Liza Minnelli y al meyor actor de repartu, Joel Grey

La historia

Brian Roberts (Michael York) ye un mozu ,  escritor y estudiante de Cambridge,   qu'aporta a Berlín pa facer el doctoráu  en Filosofía y mentanto,  pa sacar unos cuartos, dedícase a dar clases d'ingles. Brian agóspiase nuna pensión ónde   conoz a Sally Bowles,  (Liza Minelli), una moza norteamericana fía d'un diplomáticu que trabaya como artista de variedaes nel KIT KAT KLUB. Sally  intenta tirá-y el picáu a Brian; esti confiesa-y que namás tuvo relaciones sexuales con muyeres trés veces y que terminaron siendo un desastre, lo que mui finamente nos dexa entever la homosexualidá, o bisexualidá del protagonista. Brian y Sally acaben faciéndose amigos y col tiempu, pareya. 

Na historia paez n'escena, Maximilian Von Heune (Helmut Griem), un aristócrata, un "vivalavirxe", al que-y gusta la xordia y el sexu, que convida a los protagonistes a pasar con él un fin de selmana ónde'l ricu va tener relaciones sexuales colos dos. Col tiempu, Sally y Brian confiesen que tuvieron matu col "cayetanu", quedando Sally n'estáu ensin saber quién ye'l de verdá'l padre de la criatura. Brian píde-y a Sally casase con él, asumiendo la paternidá y dir los dos a vivir a Cambridge, cosa que de mano ella ve bien, pero en pensando la vida que-y espera, recula, decide albortar ensin conta-ylo a Brian. A lo cabero, él decide volver pa Inglaterra mentanto Sally siguirá nel KIT KAT KLUB, nel CABARÉ.

Hai tamién una historia secundaria que fala de Fritz Wendel (Fritz Wepper), un xudíu alemán que se fai pasar por protestante  y al que Brian-y da clases particulares d'inglés. A Fritz gústa-y Natalia Landauer (Marisa Berensson), una xudía rica que lu refuga  al sospechar que va polos cuartos. Sally aconseya a Fritz que sía más directu y al final Natalia acaba namorándose d'él. Eso sí, Fritz tendrá que confesar que ye xudíu y la historia acaba en boda, casándolos un rabinu. 

Kit Kat Klub

L'OTRU GRAN PROTAGONISTA ye'l KIT KAT KLUB, un cabaré de Berlín, que ye onde canta y bailla la nuestra protagonista, Sally Bowles. Ye'l filu conductor de toles histories onde siempre  ta presente'l contestu temporal y sociopolíticu del momentu que coincide cola crisis de la República de Weimar y la medra del nazismu. El KIT KAT KLUB yera esi abellugu, esi requexu de tolerancia que de toles formes nun foi ayenu al trunfu del nazismu.  Preba d'ello, ye como al comienzu de la película espulsen del cabaré a un nazi uniformáu  mentanto a lo cabero, la mayoría del públicu son nazis. Lo mesmo pasa colos comentarios, canciones y chistes del Maestru de Ceremonies, onde pasu ente pasu va normalizando'l discursu antisemita. 

Toles canciones de la película  tienen como escenariu'l  KIT KAT KLUB a nun ser una: "Tomorrow belongs to me", onde nuna Fiesta de la Cerveza paez en primer planu  la cara d'un rapaz roxu y de güeyos claros echando un cantar. Pali que pali, el primer planu va alloñándose y el mocín en custión trai uniforme militar. Nuna panorámica xeneral, la xente ellí presente ponse de pie a cantar col nenu, resultando un himnu nazi. Ye llamativo que tol mundu canta, menos ún, un paisanu ya un poco mayor que con cara plasmu, ye l'únicu que nun se pon de pie y amás, nun canta. 

Life is a cabaret.

La canción ye un convite a vivir la vida con allegría y a despreocupase del mundu y de too aquello que ta'l nuestru alredor. Cuando Sally Bowles canta nun fala del cabaré como'l Kit Kat Klub nin nengún otru espaciu físicu sinón una metáfora de la vida enllena de música, vinu y cellebración. Carpe Diem. La vida ye mui curtia como p'andar esmoleciéndose por aquelles coses que pasen alredor. 

Y  90 años depués ...

Cuando  vi a Rodrigo Cuevas nel Auditoriu "Teodoro Cuesta" de Mieres col espectáculu "Electrocuplé" lo primero que me vieno a la cabeza foi Cabaré y el Kit Kat Klub. Yera una riestra de canciones de'estilos bien destremaos onde entemecía histories, cuentos y hasta vivencies personales. En paralelo, la situación d'aquella España de 2016 yera'l resultáu de la crisis financiera de 2008 que terminó con una mayoría absoluta del PP y con un gobiernu d'esti partíu que supunxo unos retayos y una perda de derechos llaborales, sociales y civiles. Esta perda de derechos y llibertaes llega'l puntu máximu cola promulgación de la Llei Orgáncia 4/2015, de Protección de la Seguridá Ciudadana, ello ye, la Llei Mordaza, entá en vigor.

"Electrocuplé", "El mundu por montera", "Trópico de Covadonga" y "La Romería" son esi contrapuntu a la Llei Mordaza; a esa España de medayes a vírxenes, santos y santones; a esa España de toros y de caza; de mantiella, peineta, con misa y procesión pela mañana y de nueches en cases de putes. A diferencia del KIT KAT KLUB onde terminó normalizándose l'antisemitismu, estos espectáculos son un convite a la folixa y a disfrutar ónde entra tol mundu y les úniques que sobren son les actitues racistes, sexistes, violentes, homófobes, xenófobes y aporófobes. Un cocu de lluz énte la intolerancia, los llevantos y la medra de la ultraderecha n'Europa onde aquello que-y pasó al "maricón de nacimientu" va casi 50 años, sigue pasando güei.

 

 

Fontes: 

www.Cineymax.es  

https://es.wikipedia.org/wiki/Cabaret_(pelicula)  

www.24sombrasporsegundo.com 

https://unaisladeideas.com/cine-series/cabaret-o-el-presagio-del-infierno/