UN ACTU FUERA DE PROGRAMACIÓN Y UNA MISS DESTRONADA (Y NACIONALIEGA)

        

NUN PAEZ NA PROGRAMACIÓN OFICIAL del FESTIVAL pero ye un eventu d'asistencia obligatoria, polo menos pa los miembros de la Delegación Asturiana. Toi falando de LA CENA LOS ITALIANOS, un actu que surdió nos años ochenta del sieglu pasáu, por iniciativa de los componentes de la Delegación Lombarda Michele Crosti, Claudio Marcato y Alberto Bianchi, a los que s'axunta'l periodista Giancarlo Nostrini, gracies a l'amistá que surdió colos miembros de la Delegación Asturiana con Lisardo Lombardía al frente. Naquellos años, tanto Asturies como Lombardía (nun toi falando de Lisardo),  aspiraben a ser miembros de plenu derechu de la organización del FIL y, cómo yá sabéis, Asturies cuenta con  delegación permanente dende l'añu 1985 mientres que Lombardía non, lo que nun quita qu'estos italianos siguieran viniendo añu tres añu, a los que col pasu del tiempu fueron axuntándose xente del Piemonte o tamién italianos que viven en Bretaña. Esta cena suel ser los xueves del Festival, acabante rematar per parte  la Banda Gaites y Grupu baille la cabera de les actuaciones de les NUITS INTERCELTIQUES y na cena, los italianos, como nun pue ser d'otra manera,  ponen "la pasta" y la grappa, una  bébora asomeyada al aguardiente, y los asturianos, cómo nun podía ser d'otra manera, la sidra, la música, el baille y la folixa hasta  bien tarde, o aína, según se mire. 

A la CENA LOS ITALIANOS tamos convidaos los miembros de la Delegación Asturiana;  tamién xente d'otres delegaciones qu'acabes conociendo a lo llargo del Festival, bien a la hora d'actuar, nel comedor, o nun de los chigres qu'había pela Ville d'An Orient/Lorient y tamién aquellos voluntarios del Festival que teníen dalgo que ver con Asturies, como ye'l casu de les nuestres tíes bretones Marcelle y Maryvonne. Nesti casu quiero falar dende la esperiencia personal. Fai 12 años que nun voi a An Orient y camiento qu'en too esti tiempu habrá munches coses que yá nun son igual que cuando tuve y asina, por poner un casu, en toos esos años, mentanto se cellebraba'l Festival, rara yera la vez que nun se corriera'l bilordiu que morriera'l Presidente de la Xunta de Galicia,  Manuel Fraga.

CÓMO DIXI, l'actu solía tar programáu pal xueves del Festival, pero na Edición de 2001, tuvo que se cambiar pal sábadu. La razón yera qu'aquel añu díbemos a contar con una invitada mui especial. Esi añu quería repitise la esperiencia de que los grupos de baille participaren nes NUITS MAGIQUES/NUITS INTERCELTIQUES, qu'hasta'l 2000 nunca participaren,  y aquel añu'l grupu  yera ANDECHA FOLCLOR D'UVIÉU, que  xunto cola BANDA GAITES CÁNTARA teníemos arranchao una "Muñeira Tormaleo", una pieza que naquellos años yera un hit parade, tanto pa los gaiteros como pa los bailladores. Tábemos namás trés pareyes porque díbemos turnándonos y xusto antes de salir, paez Lisardo diciendo que-y paez mui guapo lo de que los grupos participen, pero que trés pareyes abúlten-y probe nun escenariu tan grande. Yo, como que la cosa nun diba conmigo, entrúgo-y pola CENA LOS ITALIANOS, a lo que me responde que tenía que pasar pal sábadu porque díbemos a contar cola presencia de MISS BRETAÑA. "Mira tu, una rapaza del mundu del glamur a la que-y interesa esto de lo celta", pensé pa min. El casu ye qu'aquella rapaza en custión, tuvo un reináu mui curtiu porque la mesma organización la destronó namás espresar los deseyos. Imaxinái un xuráu estráu de vieyos verdes y bederres sentaos nuna mesa llarga mientres desfilen les aspirantes a MISS, y nel intre de proclamala Miss, xusto cuándo a la rapaza-y  ponen la corona, dan-y  un ramu flores  y suenen los aplausos del  públicu que va a esi tipu de concursos casposos, el presentador píde-y a la Miss en custión que faiga unes declaraciones. Cuento qu'aquellos bederres y vieyos verdes del xuráu y la versión francesa de Ramón García contaben que Miss Bretaña falara de la PAZ MUNDIAL o ACABAR COLA FAME NEL MUNDU, pero non, MISS BRETAÑA salió un poco nacionaliega y reivindicó  NANTES como la capital histórica de BRETAÑA, cosa que nun sentó mui bien a la organización del concursu y poro,  a los vieyos verdes y bederres que piensen qu'una Miss nunca tien que se meter en política, asina que como solución,  quitáron-y el títulu p'acabar dándo-ylu a una moza menos respondona. 

 Lo que nun sabemos ye por qué a Miss Bretaña-y dio por dir cola Delegación Asturiana y non cola Bretona, que sería lo más normal, la Gallega o la Escocesa. ¿Tendría la Miss una amiguina de la edá d'ella, de cuando yeren nenes,  con una güela asturiana, pa más señes de Cualloto, que-yos facía al vecindariu arroz en lleche o fabes? ¿Cantaría-y a la ñetina "La Pipiona" mientres l'añaba pa que se dormiera y a Miss Bretaña aquel cantar quedó-y grabáu a fuéu?  El casu ye que daquella, El Madreña Connection nun tuvo mui espabiláu y les razones poles que Miss Bretaña foi a la Cena los Italianos nunca les sabremos. 

Aquel sábadu, ANDECHA FOLCLOR D'UVIÉU descansaba y  el día antes teníemos que decidir democráticamente qué escursión díbemos facer pal otru día. Había dos opciones: Kemper o'l Bosque de Brocelandia, ónde según mos contaben tenía un aquel máxicu. Salió con mayoría aplastante la opción máxico-Danza l'Osu y al otru día, cuándo dempués de casi 200 km aportemos a lo que yera'l Bosque de Brocelandia decatéme que la democracia tien llagunes y nun ye perféuta. En Brocelandia taba la tumba de Merlín, un túmulu con unes xamasques atacaes de cintes y de papelinos colos meyores deseyos; la Fonte de la Mocedá, un pozu, que según cuenten, que si bebes del agua  na nueche  San Xuan vas vivir pa siempres, enxamás y un día... A ver, cuento que si bebes y nun te pasa nada ye que tas inmunizáu y pa rematar aquella visita había como los restos d'una antigua cantera onde a daquién se-y ocurrió facer con regodones la silueta d'un trisquel... Tamién había un Centru d'Interpretación d'Estudios Artúricos, mui asomeyao a los centros d'interpretación qu'atopamos nel nuestru País y que valen pa poco. Dellos de los votantes de la propuesta máxica arrepintiéronse y hasta perhí s'oyeron voces que dicíen "Qué puta mierda ye esto de más de dos hores n'autobús pa ver una puta tumba". Ya dempués de la cena, fuimos a les actuaciones y dempués a recenar, ello ye,  a LA CENA LOS ITALIANOS onde como sospresa paeció MISS BRETAÑA entafarrando de glamur la celebración Italo-Astur qu'aquella nueche duró hasta l'amanecerín. 

LA BANDA SONORA D'AQUEL FESTIVAL foi DENEZ PRIGENT,  un cantador de gwerz qu'esi mesmu añu presentaba una propuesta musical anovadora al rodiu d'esti estilu. El gwerz ye un xéneru musical propiu de Bretaña, ónde se cuenten histories de diversa temática, con un aquel tráxicu, acompañaes a la voz d' una melodía monótona con munches cuartetes y siempre en bretón. De toles maneres, dempués de 22 años si teo que me quedar con un trabayu ye con AZELIZ IZA, que ye un gwerz que popularizaron les hermanes Goadec nos años setenta,  lo que vendríen a ser María, Arcides o Concha Tresmonte en versión bretona por poner dellos casos,  y tamién ye'l cantar que sirve de filo conductor al trabayu qu'aquel añu asoleyó la BAGAD DE KEMPER  que remata con esta Suite de Gavottes des Montagnes. Un discu que, dempués de 22 años, sigue igual de frescu.