LA "MUI ARMADA" CIUDÁ DE CUENTU

Cuando’l Soberanu llamó en persona a Don Wifredo pa comunicá-y que los actos centrales del Día l’Exércitu diben facese en La Ciudá de Cuentu, Don Wifredo entró n’estáu de shock y ello asustó a los miembros del Conseyu de Sabios que taben con él. Menos mal que los conocimientos médicos que’l Sr Cerulleda alquirió n’otra vida enantes de ser un servidor de lo público, fueron quién a apanguar los ánimos de los aconceyaos cuándo-yos dixo:  “Don Wifredo es muy sentido y se emocionó visiblemente por la noticia. Nada grave”

UNA VEZ que pasaron los actos conmemorativos del Día l’Exércitu, el Conseyu de Sabios volvió a axuntase na cafetería de siempre al par del café con lleche, doble pal Delegáu de Dios, y los suspiros fechos pola Primera Dama que deprendiera a facer d’aquella señorina que tuvieron en casa, aquella “que hablaba el bable de verdad, el auténtico, no ese prefabricado que nos intentan imponer”.

YERA UNA XUNTANZA d’autocomplacencia, de mirase al meligru porque los actos del Día l’Exércitu salieron a pidir de boca. Pa detrás, el tiempu acompañó y l’izáu’l Trapolexu, les alboraes, los pasucais de la sesión vermú,  los distintos talleres empobinaos a la reciella y el Desfilón nun pudieron salir meyor. Milenta mil persones alloquecíes taben sentaes nes terraces, metiéndose pelos tanques, tanquetes, aviones y carros de combate, amirando clisaes pal Desfilón mentanto xiringaben cola mano trapolexinos que’l mesmu Don Wifredo s’encargó personalmente de mercá-yos al matrimoniu emprendedor del estremu oriente formáu por Feng-Cha y Laura-Huang que xeneren riqueza y creen puestos de trabayu.

La Ciudá de Cuentu enllenóse de fauna castrense de toa triba, con nada menos de 6000 figurantes revestíos de toles formes y colores: almirantes, pilotos, marineros, Soldaos rasos, Capuletos, Lexonarios, Emplumaos, Guardies Reales y Monárquicos, Saltimbanquis, Trespintaos y Corneteros ensin escaecer los caballos, cabres y castrones, aparte de los trapolexos y xuguetinos a base de tanques, tanquetes, carros de combate y avioninos que tuvieron esperdigaos per La Ciudá de Cuentu  de la mesma traza que cuando un neñu bascula d’un bombu  “Bilore” los xuguetes y llueu nun los paña, dexando’l cuartu entrastiáu.

Sicasí, pesie al ésitu de les xornaes pasaes, a Don Wifredo quedaba-y un poco resquemor: “No lo entiendo, no lo entiendo”, repitía machaconamente, “No sé a qué fin organizan el desembarco en La Ciudá Playa, pudiendo tenerlo todo centralizado en La Ciudá de Cuentu”. El Delegáu de Dios trataba de consolalu diciéndo-y “Wifredo, no te sulfures, los de La Ciudá Playa son también hijos de Dios, y de los nuestros. Angelina Morgan es una gran mujer”;  el Sr Pindio pa intentar ganar puntos énte Don Baltasar Cerulleda, que nestes últimes xuntes tuvo que facer de médicu, facía por da-y la razón a Don Wifredo encismando y diciendo “eso es cosa de Perrosanxe y El Coletas por culpa de l’Amnistía, como represalia”, a lo que la Primera Dama respondía, “Pindio, no le digas nada a Wifredo, aunque tiene razón, ya sabes cómo se pone”. Al final Cerulleda, p’apanguar los ánimos dixo “Wifredo, quizás el desembarco sea mejor en La Ciudá Playa por eso de que es mas fácil hacerlo ahí porque tienen mar”. La rempuesta a la opinión del Sr Cerulleda foi un silenciu que se cortaba a hachazos entemecíu cola cara vinagre de los Sres Pindio y Delegáu de Dios.

El pack del Día l’Exércitu foi izar y llantar trapolexos; alboraes; sesión vermú al par de les terraces d’HOSTELERÍA MIAGONA D’ASTURIES a base de pasucais con música militar; talleres de pinta-cares; xuegos pa neños “Tiru-diana al Tridente”; talleres-demostración sobre cómo facer un deshauciu d'okupes, con K, a cargu del Centru Especial d'Empleu DESATRANKA S.A. y rematar con un desfile grandón presidíu polos Soberanos onde punxeron a furrular tolos xuguetes esperdigaos per La Ciudá de Cuentu, ello ye, tanques, tanquetes, carros de combate, cañones y avioninos. Pa los aconceyaos foi una organización de 9,99 sobre 10. El 0,01 que faltó pa poner el ramu foi l’entamar el desembarcu fuera de La Ciudá de Cuentu

 La Ciudá de Cuentu tuvo que correr colos gastos del agospiu de delles unidaes del exércitu y, como nun podía ser d’otra manera, L’ Atalaya, el Club priváu del que Don Wifredo foi Presidente Plenipotenciariu,  acoyó a los Regulares, a la Lexón y a cabres y castrones. Ye cierto qu’a los señores socios de L’Atalaya nun-yos facía muncha gracia que los lexonarios y regulares xunto cola cabra y castrón montaren les tiendes de campaña y tomaren les instalaciones d’un sitiu tan selectu, pero too sía pol interés xeneral d’una empresa  muncho mayor que ye España y por ello paga la pena facer un sacrificiu. Asina,  la primera Dama vio como na so residencia privada una cabra y castrón qu’andaben a sos deleres acabaron comiendo los rosales que tenía ella plantaos nel xardín y ello truxo como consecuencia que cabra y castrón se punxeran malos, foriaren y dexaren los praos atacaos de cagaritos pa mayor molestia de Don Wifredo y Primera Dama y  los señores socios del selectu club. Pa detrás, como la cabra “Baraka” y castrón consorte taben malos, nin una, nin l’otru pudieron  participar nel desfile y al nun haber animalinos d’esa especie que tuvieren adomaos pa desfilar tuvieron que facer un cambiu d’última hora, dándo-y un toque más asturianu del que la prensa local tomó nota: contar con una de les xatines de la perconocida influencer primaria del sector agroalimentariu, Choni Castro. Eso sí, equí como naide trabaya por amor al arte, Choni Castro punxo como condición, daos los sos oríxenes nel mundu castrense, desfilar ella tamién, y equí hubo un conflictu col mandu militar pol fechu de qu’ella quería dir cola la cámara’l móvil delantre  mentanto desfilaba, ello ye, tipu selfie,  estremu que nun sentó nada bien nes files del exércitu.

Otra anécdota, tamién relacionada col tema loxísticu foi que La Ciudá de Cuentu corrió con dellos de los gastos de los menús, y como solíen avezar colos grupos folclóricos, Guadalupe, conceyala de Fiestes, Fiestines, Cabalgates, Decoración Nataliega y Desagospios a indeseables del Tridente, nun tuvo otra ocurrencia que preparar unes bolses con cachos de pegarata de bonitu con tomate que sobraren del Martes de Pegarata y repartí-yosles ente los distintos soldaos. Al paecer, el bonitu y el tomate picáronse y dellos de los soldaos tuvieron col culu apegáu a les lletrines instalaes en L’Atalaya. La entrega formal de les bolses de comida fixérales Guadalupe col traxe d’asturiana que-y fixera la güela “pa si un día tenía que se revistir” por si salía escoyida reina les fiestes de L’Atalaya. Detalle qu’al Sr. Al-Mierda, presidente d’HOSTELERÍA MIAGONA D’ASTURIES, S.A. nun-y sentó bien porque coles pegarates sobrantes nun vía nichu de negociu. El casu ye que la cosa quedó en nada por ser los de la Lexón, menos mal que la bolsa col cachu pegarata de bonitu nun foi a parar a los estómagos de los Soberanos y de la Soberanina, que como toos sabemos ye d'aparatu dixestivu repunante y delicáu.

El Delegáu de Dios en La Ciudá de Cuentu dio la bendición al Trapolexu qu’izaron na Plaza’l Panchón, pero echó de ver un sermón d’esos que ta avezáu a dar tolos ocho de setiembre na Santa Cavierna énte la presencia del Presidente Dorián Buelga.  

El Conseyu de Sabios de Don Wifredo apauta por mayoría aplastante amestá-y al escudu de La Ciudá de Cuentu que tenga’l títulu de MUI ARMADA y solicita al Soberanu que los actos del Día l’Exércitu se faigan siempre equí.  La única voz discrepante, que malpenes se fixo sentir, foi la del Dr. Cerulleda, que dixo que nun yera conveniente tantu despliegue militar y que nun yera preciso axuntar relixón y estáu a lo que’l Delegáu de Dios retruca “Ustedes los comunistas son muy valientes de decir todo lo que les venga en gana a cuenta de la democracia. A ver si son tan valientes de soltar esto en La Meca”