COLA CACHARRA A ESTES ESPALDES TAN ANCHES

 Y VAN VENTISEIS

Doi los trapos por un escenariu 😛

CUALQUIER MÚSICU que me sienta referime al mio cordión como LA CACHARRA pensará que cómo se pue falar asina d'un instrumentu con tantu despreciu. Munchos amigos reales que me conocen saben la historia d'esto y como güei, 20 de marzu, una rede social ta recordándomelo, préstame ponevos la historia pa que tanto los que la saben, como aquellos que non, sepan el PORQUÉ d'esti bautismu y, tamién, pa qu'esto quede nesti blog. Pue llegar un momentu que fartuque de redes y ye una pena qu'esto se pierda, asina que voi dexalo equí y, de pasu, que puea llegar a más xente que nun tea na rede del puritanu y "somatén" de Zuckerberg.

Un día de final d’iviernu de 1998, llámame un amigu pa dir a tocar de pareya con elli (gaita y cordión) a un pueblu del so conceyu. Cellebraben San José, que del 19 de marzu, pasaba pal sábadu, como munches de les fiestes de la zona rural d’Asturies . Pente selmana, malpenes queda xente nos pueblos nin cures, que cómo bien sabéis, agora como si fueren mayestros especialistes d'un CRA, tienen qu'andar d'una parroquia a otra, col riesgu de qu'un día los apare un "Capuletu" mal encaráu, y esti-y mande poner el chupu y dea positivo.

          

Daquella, la comisión pagábenmos 7.000 pesetes a caún y la xinta nel Centru Social del pueblu. Nun yera muncho, lo normal taba en 10.000 pesetes, pero bueno, pa mi veníame mui bien porque yera una disculpa coyonuda pa quedar col mio amigu, y pa pasu, esparder porque andaba cola la cabeza un poco embotada col tema les oposiciones, que nun yera como agora, onde podíes escoyer nota d’otres convocatories a les que te presentares y, pa detrás, podíes cayer de la llista y nun trabayar. Pero bueno, eso ye otra historia que nun vien a cuentu.

Yera un sábadu de marzu, nun m’alcuerdo si’l 14 o’l 21, xusto nel entamu de la primavera, un día mui a xuegu cola estación que taba d’estrena: soleyeru, cielo raso y temperatura agradable. ¿Qué más se pue pidir pal día la fiesta? Naquel tiempu notábense más les estaciones y, anque foi un añu de poca ñeve per baxo, había ganes d'un poco de solín y temperatures más altes. Teníemos que tocar la misa, procesión y sesión vermú n’acabando la subasta la ramera, cosa qu’enxamás viera hasta esi día, y que me prestó muncho ver esta tradición qu’entá sigue viva en dellos conceyos del centru occidente del País.

De siempre, el mio amigu y yo tuvimos y tenemos cierta complicidá, y non solo a la hora tocar sinon tamién ente cualesquier situación que pasaba alredor . El tar colocaos tres del altar, preparaos pal oficiu y ver aportar una vieya conocida, llicenciada en Filoloxía, facedora de toponimies varies (nos noventa taba de moda y tenía ciertu caché, nos ambientes asturianistes, facer la toponimia d’esta o d’aquella parroquia ), ufrecése-y al cura pa lleer , y ésti reñéla por dir poco a misa; o cuando’l mesmu cura garra al monaguillu de los papos, un nenu qu’agora andará polos trenta y picu años, y pincipia a xiringalu. Coses asina valíen pa echar unes miraes de rebisgu, ríite un poco de la situación y facer comentariu de les xugaes más interesantes.

Toquemos la misa; la procesión, onde la nuestra conocida, xunto con otres moces, carretaba del santu pola peana; la subasta la ramera y la sesión vermú. La verdá, que mui cómodo porque siquieramente teníemos que mos afatar pa la ocasión. Aporta la hora xintar y pónenmos nuna mesa colos que mos contrataron, poro, los qu’entamaben la Fiesta. Tamos falando de xente, natural d’esi pueblu que vive y trabaya n’Uviéu, pero que diba tolos fines de selmana cola familia p’aende, dándo-y asina vida a un pueblu nel fin de selmana, y que de nun ser por ello, como munchos pueblos d’esti País, taría condenáu a morrer.

                                              

PINCIPIEMOS a xintar y mentanto falábemos colos anfitriones de les coses qu’arranchó l’Asociación de Vecinos nestos caberos años, apara un coche de gama alta xusto énte la puerta. Pósase un señor, y pol corte que tenía, decatémosmos que debía ser daquién “importante”. Nun hubo más que ver cómo se llevantaron los presentes de les silles, pa face-y el rendibú y buscá-y un sitiu afayadizu na mesa nuestra onde xintábemos. Darréu d'ello, como si de l’Adoración del Neñu Xesús se tratara, la xente emprima a llevái-y llargueraos de comida, y ente tenedoráu y tenedoráu soltaba, como si d’ un cura de sotana y bizcochu de soletilla se tratara “no sé si debo porque acabo de adelgazar seis kilos” o “Cómo se nota que estos huevos son de pueblo” cuando daba cuenta d’un flan de casa que-y traxera ún de los ellí presentes que servilmente-y entrugó si s'alcordaba d'él y "l'Importante de Oviedo" retrucó con un monosílabu "NO" cola boca llena.

El micromundu xiraba alredor d’esti señor, que resultó ser el Viceconseyeru de Servicios Sociales del Gobiernu Asturianu de Sergio Marqués, José Javier Suárez Álvarez-Amandi, el mesmu que meses más tarde-y presentó la dimisión al señor Presidente, como elli lu llamaba, ente llárimes y xemíos. En 2023, volvió a la política activa presentándose como candidatu de FORO-ASTURIAS, y pensé pa min: a lo meyor fui parte de poné-y un guañu asturianista a esti señor, que guapamente yera un diamante en brutu del asturianismu.

 

Como dicía, yera Viceconseyeru de Servicios Sociales, los vecinos taben acabante de dá-y una vuelta al pueblu, mui remocicáu, con un centru social nes antigües escueles. Camiento que tuvieron que tratar con él directamente, mal nun se debió portar y, agradecíos, convidáronlu a San José. Agora, los vecinos queríen dálu a conocer , y qué meyor manera que presentando la candidatura de R. a Pueblu Exemplar. Pa ello, qué menos que falar col Viceconseyeru a ver cómo enfocaben el tema pa qu’asina, nel mes d’ochobre tuvieren la visita de nada más y nada menos que d’un Príncipe preparáu. Mentanto falaben de cómo había que lo orientar, poníase l’autoridá mui enchipada diciendo lo cansao que yeren les sesiones na Xunta Xeneral, y de lo guapo que yera la vida nos pueblos. Ye más, espetó “Qué bonita es la vida de pueblo, tener una casa con un poco de tierra, estar sentado cerca de la chimenea leyendo un buen libro”, a lo que’l mio bon amigu-y retrucó, “Y una fesoria”. Silenciu total. Si los güeyos fueren puñales, duldo muncho que’l mio amigu saliera con vida d’esi Llar Social y más, qu’años más tarde fuera un personaxe mediáticu. Menos mal que’l mesmu Álvarez-Amandi , con un aquel de personaxe llanu y campechanu pa romper el xelu salta “Bueno… y una fesoria también”.

Viviendo lejos del río...

Mentanto, la conversación siguía centrada no que diba ser la candidatura y cómo había que la cocinar, el mio amigu y yo volvímonos invisibles y ente patada y patada per baxo la mesa, ye ehí cuando’l mio amigu diz que vamos colar, pero enantes de marchar vamos echar un par de pieces pa despidinos. Ponémonos a tocar, y el Señor Viceconseyeru, con un aquel de vese cargu, espétame: “Oye tu,¿ y qué es esa cacharra tan bonita que tocas?”, a lo que-y retruqué “Ye un curdión de botones, o diatónicu”. Eso sí, en tocando un par de pieces de despidida, zámpamos “Y vosotros estáis también contratados para cuando venga el Príncipe, ya me encargo yo de hablar con el Presidente” , cosa qu'al mio amigu y a min facíamos una ilusión especial.

                     

El restu de la historia yá lu sabéis: R. nun tuvo l'honor de recibir el Premiu nin al Príncipe; el Viceconseyeru dexó de sélo a los trés meses más tarde ente ximíos, llárimes y pucheros; nin el mio amigu nin yo tuvimos l’honor de tocar énte tan illustre personaxe, cosa que tampoco lo fixi cuando vieno la Monarquí al mio pueblu en 2007. Y pa rematar, d'ehí p'arriba, lAmandi bautizó al instrumentu y en cuenta tocar un curdión de botones, toco LA CACHARRA.