LA RAYA FINA DEL CONSTITUCIONALISMU ESPAÑOL
Hasta hai bien pocos años, yera fácil estremar ente ser constitucionalista y d'estrema derecha. Por embargu, anguaño, la llende que xebra ún y otru llau ye tan fina, tan fina, que guapamente pues dir d'un sitiu a otru y nun sabes realmente per ónde te tas moviendo. Eso sí, lo que ta claro ye qu'a un constitucionalista de dereches y a un facha présta-yos muncho tirar de símbolos y ye quiciabes equí onde los matices que separten al facha del demócrata de dereches, tán cada vez más entemecíos ente ellos y poro, muncho más difíciles d'estremar:
Pa ello, vamos poner dellos casos que mos puen servir pa desendolcar esti filu:
1. LA MONARQUÍA
Aquellos años del bipartidismu y alternancia feliz ente PSOE y PP, la figura del Xefe l'Estáu taba fuera de custión y la práctica totalidá de los partíos a nivel estatal aceptaben esta figura ensin nengún tipu de resquiebra, y lo mesmo pasaba colos medios de comunicación, avezaos a facer una emponderanza al monarca y a tola familia, qu'en non poques veces rayaba lo servil. "Tenemos un Rey que no nos lo merecemos" o "Yo no soy monárquico, soy Juancarlista" sentíemoslo un día sí y otru tamién a conocíos periodistes, tertulianos, famosos y famosinos. Quiciabes la primer voz crítica contra esta figura a nivel de partíos estatales foi la de Julio Anguita, a lo que prácticamente tolos medios de comunicación se-y echen enriba, incluyida la compañera de partíu, Cristina Almeida, diciendo que'l Rei-y cayía mui bien y qu'amás, tola familia yera simpática y encantadora.
NAQUELLOS AÑOS, la ultraderecha atechada nel paragües del PP, y nesti casu cola boca pequeña, xunto con otres formaciones estraparllamentaries: España 2000, Fuerza Nueva/Frente Nacional... consideraben al Xefe l'Estáu como un traidor a la patria. De toles formes, el refugu a la Monarquía yera simbólicu, y poco más.
L'apaición n'escena d' UPyD y darréu d'ello Cs fai que la Institución siga teniendo tol puxu dientro del arcu ultracentrista estatal. Pue dicise que n'España nun hai un partíu de centro derecha o de dereches a nivel estatal que sía a axuntar un sentimientu republicanu. Cristina Cifuentes, del PP, dixo ser republicana, sicasí nun dexa de ser un casu aisláu dientro d'un oceanu de monárquicos.
N'abril de 2019 y llueu en payares d'esi mesmu añu, pola mor de la repetición electoral, entra la ultraderecha, al traviés de V💩X , nel parllamentu español per segunda y tercer vez dende 1977. La primera fuera na llexislatura que va d'abril de 1979 a ochobre de 1982, onde Blas Piñar tuvo un escañu como diputáu de FUERZA NUEVA (FN) y pensaba de Juan Carlos I de la mesma traza que lo facíen los partíos minoritarios yá denomaos: un traidor con toles lletres. V💩X, con una representación bien abultada, ruempe cola manera pensar d'esa ultraderecha de FN y restu de derecha estraparllamentaria y acéuta ensin nengún tipu de reparu a la monarquía, formando asina ente toles dereches y ultracentru un bloque compactu.
Ye tres el fracasu de la sesión d'investidura d'Alberto Núñez Feijoo cuando Felipe VI propón a Pedro Sánchez como Presidente nuna segunda sesión d'investidura cuando'l sofitu a la monarquía pincipia a tener fendedures per parte del bloque constitucional que va del ultracentro a la ultraderecha, considerando otra vuelta al monarca como traidor o cobarde pol simple fechu de cumplir el papel que-y encomienda la Constitución, recoyío nos artículos 62 b, d y e, sobre convocar y disolver Les Cortes, nomar al Presidente'l Gobiernu y nomar y separtar al restu los miembros del Gobiernu a propuesta' l so Presidente; el 91 sobre la sanción rexa de les lleis aprebaes peles Cortes, qu'inclúi por supuesto la d'amnistía y el 99 del testu constitucional que fala de proponer Presidente'l Gobiernu. Ello fai que'l Monarca pierda siguidores dientro'l bloque "constitucionalista" de dereches, ensin estremar a qué partíu voten. Ye precisamente nes caberes concentraciones énte la Sede del PSOE en Ferraz, los ellí concentraos tiren d'eslóganes que paecen robaos a la izquierda republicana como aquel de "Los Borbones a los tiburones" o tamién otros, de corte más simplayu, como "Felpudo VI"
Va resultar que'l meyor garante de la Monarquía va ser el PSOE.
2. LA BANDERA
Hai que dicir que la bandera española bicolor nunca llegó a guañar dientro de tola sociedá. Hai un sector de la mesma, venceyáu a la izquierda y al republicanismu, que nun se siente identificáu cola bandera actual d'España. ¿Por qué?
Nos primeros años del réxime del 78 yera mui fácil d'estremar quién yera un demócrata de dereches de quién yera un auténticu facha y, cómo nun podía ser d'otra manera, el matiz taba na mesma bandera, pa ser más esactos nel escudu. De mano, la derecha constitucional usaba l'escudu monárquicu mentanto que la más derecha tenía l'escudu'l "páxaru". Por embargu, anguaño, si vemos a una persona envuelta nuna bandera bicolor sabemos que ye de dereches, ensin saber de qué derecha esactamente ye, si la de menos o de la más. Les manifestaciones na Plaza Colón; la concentración de Felipe II esti pasáu 24 setiembre y la manifestación de Barcelona contra l'amnistía del 8 d'ochobre vemos que la bandera "del páxaru" tien poco puxu y, poro, ye difícil destremar al derechosu d'al facha. Sicasí, nes concentraciones énte la sede del PSOE en Ferraz el númberu de banderes con páxaru medró respeuto a les qu'había en Barcelona y Madrid facía bien pocos díes
De toles maneres hai coses que me llamen l'atención: la primera ye, ¿cuándo vimos una bandera España en manifestaciones a favor de servicios públicos o reivindicaciones de calter social? Yo, enxamás; la segunda, qu'a la xente que va dende l'ultracentrismu a la ultraderecha chóca-y enforma qu'esa mesma bandera nun acabe de prender ente la militancia de la izquierda y la tercera, ta la xustificación del mesmu ultracentrismu qu'acaba dándote una llección d'historia, diciendo que'l "Trapolexu" ye de la dómina de Carlos III; que'l páxaru del escudu ye "el Águila de San Juan" y que el xugu y les fleches son de cuándo los Reis Católicos. ¿Y? La esvástica ta asociada a una cruz solar d'orixe precristianu. Ehí lo dexo.
3. LA CONSTITUCIÓN.
DELLOS de los que dicen agora que la Constitución ye una llei eterna, que nun se pue tocar y cola que tanto s'enllenen la bocona con ella de mil emponderances, nun saben, o nun quieren saber, qu'en 1978 namás la mitá del grupu parllamentariu d'Alianza Popular, ascendiente directu del PP, votó a favor de la mesma. PP, V💩X y los estintos cítricos maurientos, cada vez que tienen oportunidá, saquen el testu en procesión pero cola impresión de nun saber qué dicen dellos de los 168 artículos, les 4 disposiciones amestaes, les 9 transitories, la cabera y la derogatoria, quedándose con parte y, asina, por poner dellos exemplos aquello del derechu a l'autonomía de les nacionalidaes y rexones; lo de les demás llingües amás del español serán oficiales; lo de la riqueza del país subordinada al interés xeneral o la iniciativa pública na actividá económica, que diz l'artículu 128, nun lo conocen. Eso sí, si falamos de la Corona, anque visto lo dicho enantes de "Los Borbones a los tiburones" o "Felpudo VI" yá teo delles duldes, o del 155 puen llegar a facese auténtiques tesis doctorales.
De toles maneres, llama muncho l'atención como nes caberes concentraciones énte la Sede del PSOE, en Ferraz pa defender la igualdá ente españoles y la Constitución, paecen pancartes y consignes contraries a la mesma. ¡¡Qué cosa!!
Enllazando col apartáu de la Constitución, estos últimos años percuerre la península una obsesión que raya no patolóxico d'una "España única": una España de toros, peñeta, mantiella y sangría; la del `A por ellos´; una España de misa, procesión y freses con nata; la de los desfiles y marches militares; la España de les caceríes de los señoritos en cotu priváu y por descontao, una España monollingüe qu'odia y tarrez la esistencia d'otres llingües. Falamos de la mesma España qu'invoca la Sanidá Pública, cuando siempre cagaron pa ella, polos 280.000€ que costaron los pinganillos o traductores. Eso sí nun gurguten de los 378.000€ de la partida en banderes del Sr. Almeida, de los 47.000€ del "Trapolexu" d'Alfredo Canteli o la carta del Sr Alcalde d'Uviéu con banderes dientro a los uvieínos de la cai Uría, que namás costaron a les arques públiques 1936 € ¿casualidá? Y pa qué falar del homenaxe que toi por apostar la cabeza, y nun la perder, de que de baldre nun salió.
"Algunas víctimas del franquismo sólo se acuerdan de sus padres cuando hay subvenciones"
En resume: PASARON MÁS D'OCHENTA AÑOS Y NUN PAGA LA PENA REMOVER FIRÍES. CADUCÓ.
D'OTRA MANO, tán les víctimes del terrorismu, y cuándo falamos de terrorismu, falamos de les 853 víctimes d'ETA porque les demás nun cuenten. Amás, hai una pequeña cosa qu'estrema estos muertos de los que tán enterraos nes cunetes, que la sede de xusticia (venganza) pa colos muertos d'ETA nin prescribe, nin caduca.
¿Cuántos años tienen que pasar pa que digan lo mesmo que los del Franquismu.?
En too esti tiempu, el PP capitalizó'l dolor de les víctimes del terrorismu d'ETA al qu'a midida diben paeciendo n'escena, fueron amestándose UPyD, Cs, V💩X y demás NEXOS en común ente ellos. Sacáronlos en procesión hasta l'aburrición y digo esto porque anguaño yá pincipiamos a ver el resquemor de ciertes víctimes y/o familiares que se sienten instrumentalizaes, siendo Irene Villa una de les primeres que fartó de tanta manifestación. A esta rapaza síguenla otros familiares como Consuelo Ordóñez, hermana de Gregorio Ordóñez, onde diz sentise traicionada, ente otres coses, por querer sacar réitu , frivolizar sobre esti tema, asina como intentar enfrentar a estos familiares colos de les víctimes del Franquismu. De toles maneres, tanto PP como V💩X siguen aneciando con ETA magar qu'esta esguliera en 2011.
Por supuesto, les víctimes del GAL (Terrorismu d'Estáu) y les del 11-M onde morrieron d'una sola vez 194 persones, nun cuenten pa nada. Ye más pal PP, les víctimes del 11-M son unos malditos apestaos pol simple fechu de fadia-yos la victoria electoral el 14-M y poro, pa da-y puxu a esti argumentu nun ta de más trescribir les declaraciones feches por distintos y perconocíos cargos institucionales del PP naquel tiempu.
"Cambiamos de gobierno por esta puta y cuatro mierdas más"
Francisco Álvarez Cascos, daquella Ministru de Fomentu, refiriéndose a Pilar Manjón, daquella presidenta de l'Asociación de Víctimes del 11 M
"Esto es mejor que un premio de la lotería porque no paga a Hacienda." Esperanza Aguirre.
Esta declaración fíxola Esperanza Aguirre al entregar una sovención a l'asociación, de Víctimes del 11-M, que presidía Pilar Manjón.
"Ahora vendrán las putas de La Montera a pedir otro monumentito".
Declaración de Manuel Cobo, vicealcalde de Madrid, de la que s'inauguró n'Atocha'l monumentu a les víctimes del 11
"Pues nada, a ver si acaba esto pronto, que es domingo y habrá que descansar"
M. Rajoy, nun actu d'homenaxe a les víctimes del 11M, que-y zampó a Pilar Manjón cuando lu foi a saludar.
Comentarios
Publicar un comentario