UNA LLUZ ENCESA EN L' ATALAYA

Mientres La Ciudá de Cuentu duerme, siempres hai una lluz encesa que nun apaga, allá no cimero, en L' Atalaya. Ye la lluz del cuartu Don Wifredo, el mesmu que-y devolvió l'allegría a una Ciudá de Cuentu coles lluces de Navidá más ruines de la Unión Europea al empar qu'enllenó la faltriquera d'HOSTELERÍA MIAGONA D'ASTURIES, S.A. 

Esti añu la lluz de L' Atalaya diba apagase unos díes n'agostu porque Don Wifredo y la Primera Dama diben  garrar vacaciones. Yeren namás unos pocos díes y, pa detrás, esti añu contaben dir cerca depués de les tarranches y resaques que dexa la FIESTA LA DEMOCRACIA. Asina que Don Wifredo y la Primera Dama garraron el montante y empobináronse pa la vecina Galicia pa, de pasu, facese los atopadizos col Sr. Freixolo, Narcodéu Incorruptu de Génova, 13. 

"Sanjenjo está imposible", dixo la Primera Dama, "estuve buscando y no hay manera"

"Mira a ver en A Toxa", retrucó Don Wifredo

"Será La Toja", retrucó sosprendida la Primera Dama. 

"A ver mujer, yá sé qué es La Toja, Sanjenjo y El Grove, eso entre nosotros, pero imagínate que el alcalde d'El Grove o Sanjenjo sabe que estamos por allí y nos hacen una recepción o mismamente si por casualidad nos cruzamos con Freixolo. Ya sabes cómo son los gallegos, que les presta que se lo digamos en gallego", dixo Don Wifredo con un tonu condescendiente. 

Como esti añu se descuidaron un poco, nin n'A Toxa nin en Sanxenxo, al pesar de les alvertencies de Ceditas, l'antecesora nel cargu de Teresa de Mattel, veraniante n'O Grove de fai dellos años, de qu'acotaren un agospiu con tiempu. Siquieramente valieron les amenaces de Don Wifredo, que tan bien-y funcionaben cuando presidía L'Atalaya,  a dellos caseros col aquel d' "usted no sabe con quién está hablando" pa buscar un sitiu ónde se quedar. A lo cabero, una cancelación de secultre y la intercesión de Ceditas fixo que-yos arrendaren una antigua casa de pescadores, mui remocicada pa casa vacacional pa la zona de Rons. Don Wifredo y la Primera Dama yeren más d'A Toxa o de Sanxenxo y O Grove, teníenlo como última opción, y dientro d' O Grove, Rons pintaba menos porque-yos abultaba menos señorial, anque había que lo dicir too, la casa taba mui bien. 

Per unos díes, Don Wifredo y la Primera Dama dexaben de llau los traxes, les corbates y los vistíos elegantonos de gales y recepciones, llevando  Don Wifredo  unos "calzóis" de color beis, un hispaniki (polos revitiaos pel cuellu colos colores patrios), unos náuticos y un h.ersetín de puntu al costazu por si refresca y la Primera Dama por un pantalón vaqueru y una camiseta ensin más. 

 

 Anque Don Wifredo taba de vacaciones,  siempre taba pillando idees pa La Ciudá de Cuentu y xusto, acabante salir de casa, queden estelaos  pol mobiliariu urbanu a base d'estatues de granitu, que por cierto, dicíen mui bien pa col horru gallegu en Villa Pelotazu. De toes elles, hebo una qu'enllenó'l corazón de Don Wifredo y la Primera Dama.

 Cuando volvió pa La Ciudá de Cuentu axuntó al Sr. Pindio, al restu de conceyales y al Delegáu Divinu y comentó-yos la posibilidá de mandar facer una estatua  hermana a la que vio camín de Rons.

"A ver, se trata de una estatua de granito que remata con la figura de un centollo, que en realidad se trata de un antiguo rey gallego que vivía en una cueva en Mondoñedo, 'O Rei Centolo'", dixo Don Wifredo cola seguranza d'un caderalgu bederre de la Escuela de Túneles, Pozos y Galeríes dando una clase maxistral a los alumnos de primer cursu. 

"¿El rey estaba hechizado y se convertía en un centollo?", entrugó'l Delegáu de Dios en La Ciudá de Cuentu, siempre a la diestra de Don Wifredo. "Yá se sabe, los gallegos son muy dados a la brujería y a las leyendas", remátó. 

"Wifredo", entrugo'l Sr. Pindio, "¿Pero qué narices pinta un centollo en Mondoñedo? Un centollo ahí no aguanta, eso está para el interior"

"¡¡Qué sé yo!!", retrucó Don Wifredo un poco desentonáu. "Supongo que sea una cueva que comunique con Vivero, perdón, Viveiro. Déjate de tanto preguntar, Pindio". 

"Habrá que pasarlo al menos por una comisión informativa", dixo un funcionariu al que Don Wifredo-y tenía ciertes hinches. 

"Mire usté, aquí se hace lo que sea más conveniente para La Ciudá de Cuentu. Ni comisiones, ni UGT, ni pleno, ni plena. Yo no soy político, soy un gestor", respondió Don Wifredo al xeitu d'aquel presidente gallegu que siempre lu morríen mentanto se cellebraba'l Festival Intercélticu de Lorient. 

Yá pensara en contratar los mesmos servicios d'aquel amigu que lo taba pasando mui mal porque tenía una cantera y los ecoloxistes taben poniéndo-y munches pegues p'ampliala. Amás, según Don Wifredo, yera un  bon paisanu que xeneraba riqueza y creaba puestos de trabayu. 

Pa la inauguración Don Wifredo tenía pensao, como siempre, una misa albentestate, oficiada pol Delegáu de Dios en La Ciudá de Cuentu;  trayer puestos de comida y bébora, onde nun podíen faltar les casetes d'HOSTELERÍA MIAGONA D'ASTURIES, S.A., y como non, un puestu onde vendieren pulpu, empanada, oreya, costielles y pimientos de Padrón. Como nota musical, y pa meter ruíu, trayeríen gaites y, cómo venía siendo vezu, nun podríen faltar los bailles d'Os Apabardeixos. L'únicu problema yera facer coincidir la inauguración pa que tuviera presente Freixolo, Narcodéu Incorruptu de Génova 13 y Bienvenido Ferrari, xefe de partíu n'Asturies. La Primera Dama, con axenda propia d'actividaes pa facer cola señora de Freixolo,  en cuenta de dar los regalos protocolarios de "Berlineses" y "Negrillones" postres típicos ellaboraos por una confitería d'El Cogollín de La Ciudá de Cuentu, contaba remangase y preparar esos suspiros que-y deprendió a facer aquella señorina que tuvo  trabayando en ca d' ellos y que por cierto "hablaba el bable de verdad, el auténtico. Daba gusto oírla". 

Y como entamu d'una dómina nueva, y xestu de bona voluntá, a la izquierda de Don Wifredo taría'l conceyal de la oposición  Don Baltasar Cerulleda, al pesar de los celos mal xestionaos  de Guadalupe, conceyala de Fiestes y Desagospios de Desórdenes Públicos de votantes d'El Tridente, y del Sr. Pindio, y por supuesto, de la rocea del Delegáu de Dios en La Ciudá de Cuentu que se tendría que cortar un poco a la hora de dar el Sermón. "Este no tiene las tragaderas de Dorián Buelga y le veo capaz de escribir al argentino ese d'El Vaticano y enviarme para Burundi", pensó'l Reverendísimu Señor pa sí.