LA CIUDÁ DE CUENTU ESCONSONA DE LA SIESTA

Semeya garrada de NORTES

GÜEI  diba ser el gran día. Por fin, Don Wifredo fadría  realidá'l suañu aquel de  comer nuna mesa al par d'un güeyu/ventanal del Altísimu, llantáu no cimero del Picu al empar qu'amiraba con arguyu esa Ciudá de Cuentu, que gracies a aquel suañu que tuvo con Santa Marta, patrona de la Hostelería, que lu envizcó a presentase a alcalde de La Ciudá de Cuentu,  salió d'aquella apatía y tristura pa convertise nuna ciudá allegre y con muncha vida onde los maríos salíen pel centru la ciudá de compra cola muyer  dexando  la faltriquera bien llena a los comerciantes y hosteleros. Don Wifredo ganare otra vuelta les elecciones, y esta vez con mayoría absoluta, desfaciéndose asina de los últimos restos d'El TRIDENTE. 

El Proyéutu estrella del so mandatu yera facer un teleféricu que fuera dende la fábrica de La Llera hasta'l Picu, faciendo una parada en L'Atalaya, solo pa VIPs. y socios del Palaciu d'Iviernu de Don Wifredo. La xestión del teleféricu diba llevala'l GRUPU BUSALSA, propiedá de la familia Sancosme, ciudadanos de bien y pa detrás activos miembros del "PAPUSDEI".  El proyeutu incluyía tamién valtar la estatua del Altísimu y facer otra asomeyada al Cristu de Corcovado y poné-y per dientro un ascensor con una cafetería-restaurante na cabeza, que como nun podía ser d'otra manera, tendría qu' esternalizar la xestión y da-yla  a HOSTELERÍA MIAGONA D'ASTURIES, S.A. del Señor Al-Mierda. Xusto énte l'Altísimu llantaría otru Trapolexu tan grande como'l que tien na Plaza La Cebaera, que-y encargaríen al matrimoniu d'emprendedores formáu por Laura Huang y a Feng Cha, que tuvieron l'aquel de convidalu a la inauguración del bazar el caberu agostu na antigua estación d'El Vascongado. "Aunque no sean de El Cogollín de Tola Vida,  son gente emprendedora que generan riqueza y crean puestos de trabajo", repitía Don Wifredo como si fuera un mantra pa xustificar la compra d'un trapolexu bicolor de grandes dimensiones que fuera a vese dende la Estación Espacial Española, Don Luis Carrero Blanco. 

El tratu colos conceyales de la oposición cambiara dafechu. Nun yera igual tratar cola Señora Radetzki, qu'avezaba a torturar a los alversarios políticos con esa machacona marcha cola  que remata'l Conciertu d'Añu Nuevu  , pa depués desapuntalos del wasap con una aplicación, fecha n'Irán o Venezuela, que dexaba a esa persona dafechamente aisllada y vetada de por vida a cualesquier rede social;  que col Señor Baltasar Cerulleda, un veteranu servidor de lo público que,  "aunque estea con los d'izquierda, es sensato y parece de los nuestros", pensaba pa sigo Don Wifredo, dempués de que gracies a él foi quién a sacar alantre esti proyéutu xunto col de rematar   la rede museística de La Ciudá de Cuentu, que consistía en crear trés nuevos museos que de xuru diben atrayer cientos, o miles, de turistes al añu. 

• El primer de los museos, yera dedicá-yoslu a los PREMIOS SOBERANOS aprovechando una antigua nave no que fuera la Fábrica de La Llera, presidíu por una estatua del SOBERANU y la familia. 
• El segundu taría dedicáu a LA SELMANA SANTA DE LA CIUDÁ DE CUENTU, con fonda tradición na mesma ciudá, polo menos dende 1995. Habría delles sales ente les que destaquen la dedicada a los presos lliberaos con una semeya de toos y caún de los redimíos y con testimonios d'antes y dempués de ser indultaos y la dedicada AL ESCARNIU pel que tuvo que pasar la Cofradía de Los Mangantes cuando nos años que tuvieron los d'EL TRIDENTE (2016-2019), teníen-yos vetada la entrada al balcón de la CASA-CONCEYU pa dar el sermón y nun tuvieron otra que mercar una escalera nun bazar chinu onde l'Hermanu Grande la cofradía tenía que dar el sermón subiendo eses escaleres de la mesma traza que lo fadría una cabra al son de la música ratonero del "Casio" del titiriteru.  El Conceyu pondría los cuartos y la xestión diba dá-yosla a la Cofradía de Los Mangantes. Con ello contentaría tamién a los del partíu "PLUS ULTRA" porque al paecer esa cofradía cuenta con munchos siguidores d'esa formación. 
• El tercer muséu va dedicase a la gastronomía. MUSÉU DEL ARMISTICIU, dedicáu  a les xornaes gastronómiques que consisten en fabes con cóngaru, fégadu encebollao y casadielles, onde'l CACHOPU va tener un espaciu permanente. Tamién equí va haber colaboración público-privada, que como siempre, el Conceyu pon los cuartos, y la xestión y los beneficios pa HOSTELERÍA MIAGONA D'ASTURIES, S.A. onde'l Sr. Al-Mierda va tener un sitiu permanente dientro del Patronatu del Muséu. 

Na primera cabina del teleféricu que subiría al Picu montaríen Don Wifredo, la Primera Dama, El Delegáu de Dios en La Ciudá de Cuentu, depués de bendicir toes y caúna de les cabines, el Sr. Pindio, Al-Mierda y como representante de la oposición, Don Baltasar Cerulleda. De mano, al Delegáu de Dios dió-y un poco rocea compartir cabina con Cerulleda, pero Don Wifredo tranquilizólu y dixo que Don Balta yera d'otra manera, que nun tenía nada que ver con esos de NÓS, que yeren la mesma encarnación del Malignu. La idea yera parar en L'ATALAYA, cuartel d'inviernu de Don Wifredo onde tomaríen un vinu español pa rematar n'El Picu , onde a los pies del Altísimu habría un escenariu onde diben actuar "Los Alaskos", Andy y Lucas y Mocedades, a petición de La Primera Dama, mentantu la comitiva dende un güeyu-ventanal del Altísimu veríen a la mocedá pasándolo bien colos conciertos

Xusto cuando yá salieren de L'ATALAYA en direición a EL PICU la cabina desengánchase del cable y cai al vacíu unos trenta metros. Nesos segundos que-y paecieron eternos a los que montaron na cabina, Don Wifredo daba allaríes como un posesu, cuando de secultre, la Primera Dama-y espeta:
"Espierta Wifredo, menudo pigazo, eh.  Parece que has tenido una pesadilla porque no parabas de dar voces. Aguanta, no nos sobra tiempo para  ir al ayuntamiento a tomar posesión"