UN PAÍS D'ANTROXU CON PROBLEMES ESTRUCTURALES

 

 

El diseñu d'unos trenes gorditinos astures  que nun entraben per unos túneles un poco rabicos fixo que'l Presidente Adrián Barbón engafentara y se tresformara naquel soldáu pantasma del cuentu de Washington Irwin, que depués de perder la cabeza d'un balazu que-y metieron, andaba pidiendo xusticia montáu a caballu, tarazando les cabeces d'aquellos que topaba pelos alredores de Tarry Town nel valle d'Sleepy Hollow. 

El casu ye que depués de tanta indignación presidencial, en Madrid, pa tenelu contentu,  fixéron-y un poco casu, pero en cuenta de rodar cabeces, rodaron  unes cabecines de poca monta,  y como guinda a esti pastel amargu, una de les cabeces decapitaes diba a retirase bien aína, asina que les quexes y llamentos del nuestru Presidente sintiéronse  na capital como aquellos que sienten llover, y como punxi na mio muria, la versión asturiana de la película de Tim Burton quedó un poco cutre, que talamente paecía protagonizada por Lina Morgan y Fernando Esteso, produciendo cualesquier cosa menos miéu. De toles formes, como Adrián y Miguel Ángel siguieron metieron ruíu,y el 28 de mayu ta ehí,  fueron quién a que'l Presidente de RENFE y la Secretaria Estáu de Tresporte, Movilidá y Axenda Urbana un llunes d'antroxu perdieran la cabeza. 

Un amigu comentóme que tábemos ente un problema estructural, non sólo de trenes, sinón tamién de víes, cosa cola que toi dafechamente d'alcuerdu, pero depués de da-y un poco a la cabeza el problema estructural que tenemos nesti País ente l'Eo y el Deva y Peñes y el Cordal ye doble, o quiciabes triple, eso sí, con trescendencia económica, como nun podía ser d'otra manera:

PRIMER PROBLEMA ESTRUCTURAL: efectivamente hai un problema coles víes y los trazaos que vienen de mui atrás, qu'en dellos casos atreveríame a dicir ensin miéu a enquivocame, que'l trazáu de l'antigua llinia Coḷḷanzo - Uviéu, polo menos el que pasa pel mio conceyu d'Ayer, ye de los años trenta del sieglu pasáu, xusto de cuándo echaron la vía. Eso mesmo díxomoslo Nacho, el mio profesor d'Historia del Institutu nos años ochenta, que podíen trayer la meyor máquina llétrica fecha n'Alemaña, pero al dar la primer curva Caborana esa máquina escarrilaba.  D'entós p'acá poco cambiaron les víes, sacante naquellos tramos que los llevó la riá en La Sierra, Cabanaquinta en 2019 y otru tramu ente Campera y Tartier (Morea) que tamién los llevó aquella ríaona d'avientu de 1980.  Cierto ye que FEVE llevaba munchos años al debalu y por si fuera poco, el 1 de xineru de 2013 FEVE foi absorvida pola RENFE, polo que los problemes d'abandonu y desdexamientu medraron enforma nos caberos 10 años, ente otres coses con vagones de segunda y tercera mano que yá fueron usaos n'otros territorios. 

Por si fuera poco, cada medios díes, hai averíes colos vagones y hai que tirar d'autobús, lo que ye un problema, sobremanera pa xente con movilidá aminorgada. Pa detrás, daqué mui corriente ye que cuando s'usa'l autobús en sustitución del tren, nun piden billete y claro ta, eso cuenta como que la demanda na llinia Morea - Coḷḷanzo ye de "cero matacero" y pasu ente pasu, l'estáu dexa d'invertir nun serviciu "ensin demanda". Nun quiero ser sospechosu, pero pamidea ta fecho adréi, con un poco mala hostia. 

SEGUNDU PROBLEMA ESTRUCTURAL: LOS POLÍTICOS.  Enxamás me sentiréis dicir que "tolos políticos son iguales" porque ye mentira. ¿Ye lo mesmo "Mediterráneo" de Serrat o "Los Fayeos de Mayo" nes distintes versiones que, por poner dos casos, que "La Salchipapa" de la polirrecebada de Leticia Sabater o los recopilatorios del pórzoles de Paquirrín? NON y NON.  Por embargu podemos dicir que n'Asturies, la inmensa mayoría de los políticos que tuvieron en puestos de poder, y tamién otros con aspiración a ello, nunca tuvieron puesta la vista n'Asturies, siempre más atentos y más enfotaos en dir pa Madrid "a trunfar"y d'otru llau nunca tuvieron una visión d'Asturies, una visión de País, siempre prefirieron que mos lo dieran too fecho, dende Madrid, aplicando pa ello la llei del mínimu esfuerciu y asina mos foi y mos va.

En 2006, énte una remodelación del Ministeriu d'Educación, los medios de comunicación provincianos falaben que'l Presidente (San) Vicente Álvarez Areces taba ente los candidatos, y al Santu en custión, pa entendemos, nun-y cabía una faba en culo, énte tal "honor" de llegar a ser Ministru d'Educación. 

¿Quién nun s'alcuerda de Javier Fernández, "El Mudu", "El Griste" (Gris y triste) cómo-y yo llamaba, con esa cara inespresiva que tenía, que solo la cambió cuando foi a probar suerte a Madrid cola "Gestoría". Ellí víeslu contentu y con carina  risa,  que se-y volvió a quitar cuando se-y terminó'l "suañu español" de "la Gestoría", Susana Díaz perdió les primaries y tuvo que volver p'Asturies a volver exercer de Presidente. 

Carecemos una clase política que nunca tuvo una idea global sobre lo que ye Asturies. Quiciabes Pedro de Silva sí pudo tenela, y según declaraciones del mesmu ex Presidente d'Asturies ente 1983 y 1991,  en 1990 tien la ocasión de reformar l'Estatutu d'Autonomía pa con ello garrar les competencies n'Educación y Sanidá, pero bien ceo saltó la executiva de la FSA-PSOE, daquella dominada de facto por José Ángel Fernández Villa, quedando la reforma nuna mera ilusión personal del ex presidente d'Asturies, lo que lu llevó a nun querer presentase más como candidatu y entós nomaron como recambiu a Juan Luis Rodríguez-Vigil Rubio, el Señor del Petromocho. 

L'Estatutu d'Autonomía na so redacción actual diz nel artículu 10 que fala de les competencies d'Asturies diz...

Art. 10.1 El Principáu d'Asturies tien competencies esclusives nes materies qu'amuesen darréu.

..

5. los ferrocarriles, carreteres y caminos col itinerariu que percuerra esclusivamente'l territoriu de la Comunidá Autónoma, y nos mesmos términos, el tresporte terrestre, fluvial, per cable o tuberíes.

Magar el mesmu Estatutu abre esa posibilidá, la de xestionar o asumir les competencies en materia ferroviaria, los distintos gobiernos refugaron tal posibilidá, siendo la única llinia ferroviaria onde'l Principáu si tien competencies la del funicular de Poncebos a Bulnes, pero según teo entendío, la xestión llévala una perconocida empresa que mos lleva'l tercer gran problema estructural d'Asturies. 

Asturies lleva gobernada casi de manera ininterrumpida dende 1983 pola FSA-PSOE, quitando'l  periodu 1995-1999 onde tuvo Sergio Marqués, del PP y el de xunetu de 2011 a mayu de 2012 nel que tuvo Álvarez Cascos. Precisamente los gobiernos socialistes de Vigil, Trevín, (San) Tini Areces y Javier Fernández,  eso d'asumir competencies en materia ferroviaria, sonaba a herexía, a obra de Satán. Siempre tuvieron más cómodos que-yos xestionaren les coses dende Madrid, y asina, cuando salía mal, taba mui guapo dicir que les culpes yeren de Madrid, curándose en salú. De toles maneres, nun hai qu'echar toles culpes a los gobiernos asturianos, tamién los gobiernos uvieín d'Antonio Massip y de Gabino de Lorenzo coles operaciones urbanístiques nes antigües estaciones d'El Vasco y Económicos tienen dalgo que ver con esti declive ferroviariu y  que tirando del cable, aportamos otra vuelta al tercer problema estructural.

A Adrián Barbón, al paecer, tampoco-y fai muncha gracia eso d'asumir competencies en ferrocarriles, teniendo en cuenta l'estáu d'abandonu nel que ta la rede cercaníes, ye un marrón de los gordos y fala de 1.500 millones d'euros.  ¿Tamos otra vuelta énte'l miéu a asumir competencies? ¿Ye meyor favorecer el tresporte per carretera y poro, al tercer problema estructural?

 

TERCER PROBLEMA ESTRUCTURAL: ALSA Y LA FAMILIA COSMEN.  La revista ATLÁNTICA XXII nel so primer númberu de 2009 foi la primer publicación que-yos dedicó unes lletres dientro del artículu "Los dueños de Asturias". Dellos númberos más tarde, otru artículu dedicáu a la oligarquía asturiana, apaez una semeya de tol entramáu del grupu ALSA y les sos conexones, semeya que guapamente paecía'l planu del Metro de Londres y según cuenten les cróniques oficioses, a (San) José Cosmen Adelaida casi se-y atraganta la cena cuando l'amu'l restaurante-y dixo qu'ALSA yera noticia nos papeles, y non precisamente en LNE. Dicen eses mesmes cróniques que'l grupu empresarial mercó la edición completa d'aquel númberu. 

Nun hebo nengún Gobiernu Asturianu que-yos llevantara la voz. Ye más, tolos Gobiernos comieron de la mano de la familia Cosmen. Quiciabes l'únicu col que la familia nun fizo cadenetes foi con F.A.C. Ello débese a que José Cosmen yera un pequeñu accionista d'una empresa d'autobuses,  AUTOBUSES LUARCA, SOCIEDAD ANÓNIMA, y que col pasu del tiempu, aportó a tener el 100% de capital, desplazando al güelu del tal F.A.C. . En fin, coses de familia, y como coses de familia que son, neso nun me meto. 

Énte esta situación de los trenes gorditinos y les infraestructures ferroviaries sal a escena el presidente de la Unión de Consumidores de Asturias pidiendo pola xestión de les cercaníes al xeitu de cómo fai la Generallitat de Catalunya p'arranchar esta situación, al tiempu que señala al grupu ALSA como causante d'esti problema estructural de les nuestru sistema de cercaníes ferroviaries. Díes más tarde, na publicación CONSUMIDOR.ES paez un artículu mui interesante tituláu "12 razones para entender la decadencia de FEVE y el ascenso de ALSA" firmáu por Pablo García. 

Llama l'atención el tarrén de la antigua estación d'El Vasco d'Uviéu, actuación estrella del alcalde A. Massip de valtala, qu'al llegar Gabino de Lorenzo al poder contaba dedicar esi solar a equipamientu pal conceyu, cosa que depués renuncia y apauta tresferilu a una inmobiliaria d'esta familia que depués quiebra. Del solar de Los Económicos, trés cuartes de lo mesmo: el Principado financia la creación d'una estación d'autobuses, que va ser dafechamente xestionada por ALSA y si había intención de crear una estación intermodal, entá siguimos esperando. 

Hasta esti añu les conexones aeries d'Asturies siempre fueron ún de los puntos flacos de les nuestres comunicaciones. Pue qu'esto seya motivao al sitiu onde tal aeropuertu d'Asturies, a cierta distancia de les trés grandes ciudaes y amás la comunicación del aeropuertu depende d'una llinia d'autobuses que comunica l'aeródromu con Uviéu, Xixón y Avilés.  Lo propio sería tener unos trenes llanzadera que comunicaran l'aeropuertu coles trés ciudaes más importantes del País, pero qué cosa, ta claro que nun interesó nin a unos nin  a otros.  Ensin querer ser malu, nin cuento que tampoco haya que facer un máster en La Sorbona pa xustificar esa negativa y esos retrasos na variante Payares. Sicasí, va años que se ruxe que ye posible qu' "esternalice"'l serviciu de tresporte viaxeros con Madrid y va tiempu qu'esti grupu anda al quite. 

Y yá pa rematar,  esti poema del mio amigu Anibal amuesa de manera mui claro cuála ye la realidá del tren n'Asturies, y en particular de l'antiguu Vasco o FEVE 

EL TREN PITA PERO NUN ANDA

El pitíu afónicu del tren yá nun marca la hora.

El pitíu afónicu y ferruñosu de tren agora marca la memoria.

Un cruxir amatagáu de la tarde murnia

como tela vieyo qu'españa.

Los inxenieros entrúguense por esi fenómenu

        y        naide  /

                        /  nun tien   /

                                /  rempuesta.

Los empresarios tamién-y dan vueltes

    y                   /                nengún

                enxamás <

                        /                  nun s'aclara.

Dende ca Tuxa, na cai de la estación, pue vese (al paecer)

una costura que-y salta al mundiu

cuando yá nun se caltién el silenciu del orbayu

y diz Tuxa qu'esi pitíu namái suena p'avisar que marcha'l tren

(y bien lo sabe ella, que nun va nél; ella ta en casa)

El pitíu ferruñosu y llonxanu del tren yá nun marca bien la hora.

El pitíu agónicu del tren yá solo marca la so propia hora.

Y cuando apare'l ruíu, va tornar el silenciu ásperu del desaniciu

a dominar les cais del pueblu

y quedará muda de presente esta dómina d'escombru

anque güei'l ruxerruxe del despiece entá sía norma

El pitíu agónicu y ferruñosu del tren marcará entós la memoria

Anibal González Rodríguez,  d' Anatomía d'un farfagón (2022)