DIR A LA FERIA Y AL MERCÁU

 faciendo balance de lo bono (y más bono)

YÁ pasaran cinco años depués de que Don Wifredo tuviera aquel suañu  nataliegu nel que Santa Marta, la patrona la hostelería, como si fuera la pantasma de les navidaes del famosu cuentu de Charles Dickens, sacara a Don Wifredo de la cama y de  L' Atalaya y lu baxara a la Ciudá de Cuentu onde vio una ciudá a escures, ensin lluces de Navidá y con munchos negocios y comercios zarraos colos lletreros "TRESPÁSASE" o "VIÉNDESE".  La xente víase triste, afamiada y peles cais munchos  taben caleciendo al par de bidones de gasolina ardiendo y nún d'ellos  foi a acolumbrar al Sr. Al-Miedra, presidente d'HOSTELERÍA MIAGONA, S.A. 

Al otru día, de la que despertara, sonó'l teléfonu de Don Wifredo y resultó ser que lu llamaba'l Socampeón d'España de Llanzamientu de Güesos d'Aceituna, daquella tamién Secretariu Xeneral del Partíu del Pueblu. Quería proponé-y a Don Wifredo salvar a La Ciudá de Cuentu de la xestión del Tridente. Al paecer, la fama de Don Wifredo como xestor exemplar trespasare les fronteres non solo de La Ciudá de Cuentu, sinón tamién d'El País y pa detrás aportara hasta la Tierra del Pimentón, del Arroz al Calderu y de les gales parrules de "Murcia, qué hermosa eres".  Tenía que lo pensar y consultar a la que diba ser la Primera Dama, porque a ella nun-y facía muncha gracia qu'anduviera metíu en política y ella, como discreta que ye, prefería tar nun segundu planu, pero'l sentíu de la responsabilidá al ver a La Ciudá de Cuentu coles Navidaes más tristes de la Xunión Europea y les tortures d'aquella conceyala d'El Tridente castigando cola "Marcha Radetzky" al altu al lleva, tanto a los neños que creyíen nel espíritu de Nadal (non del tenista apolíticu), a les families felices de misa de doce y vermú y hasta, según les llingües más afilaes, a compañeres de partíu que cantaben y rellumaben con lluz propia como lluceros en cielu, llevólu a dar un pasu alantre y presentase pa dirixir los destinos de La Ciudá de Cuentu. 

Ganó y ente los llogros de Don Wifredo,  amás de llantar EL TRAPOLEXU, tán el quitar los bancos onde nun podíen sentase la xente d'orde y de bien; recuperar a la Reina de les Fiestes; crear la figura de la Primera Dama; firmar el conveniu de La Llera y facer "colomines gallegues"; poner un horru gallegu nunos xardinos franceses n'homenaxe a "la gente de pueblo" (y un chisgu a Freixolo, Narcodéu Incorruptu de Xénova 13); llenar la caxa d'HOSTELERÍA MIAGONA, S.A. que xestionaría la totalidá de los eventos de La Ciudá de Cuentu; quitar de los camiones de basura'l nome "inventado y de laboratorio" de la noble ciudá; un carril-bici, envidia hasta de la mesma ciudá d'Amsterdam; una película promocional del aniciu de La Vía Pelegrina y convertir les Navidaes de La Ciudá de Cuentu nuna referencia a nivel mundial, de manera tala, que'l mesmu director de l' Axencia Espacial Española "Luis Carrero Blanco", que ta casáu con una ñeta d'asturiana,   que cuando diba a vela a casa facía unes fabes d'espatarrar, felicitó personalmente a Don Wifredo, diciéndo-y que dende l'espaciu vense muncho meyor les lluces de La Ciudá de Cuentu que les de Vigo, y que si los Reis d'Oriente vivieren güei, envede empobinase a Belén, diríen a la Ciudá aniciu de La Vía Pelegrina y la de La Prefecta.

Colos deberes fechos y la tranquilidá de tar señaláu pol Narcodéu Incorruptu de Xénova 13 pa renovar otros cuatro años el compromisu de xestión de La Ciudá de Cuentu, al contrario de la suerte de Teresa de Mattel, sustituyida por un coche d'alta gama veníu del estranxeru, tocaba entamar la embaxada pa promocionase  na FERIA DEL TURISMU que se cellebra na Capital del Reinu tolos meses de xineru. Don Wifredo siempre s'arrodiaba de la xente de máxima confianza, ello ye, de La Primera Dama, del Sr. Pindio, del Delegáu de Dios, del Sr Al-Miedra y de Guada, que fixo una xestión impecable de les Fiestes, desagospiando de la Plaza Mayor a los "elementos subversivos" y tamién de les caberes fiestes navidiegues, onde Don Wifredo foi felicitáu pol mesmu Delegáu de Dios pola decoración nataliega, gracies al bon gustu de Guada y  tamién de la Primera Dama, encargaes d'escoyer les lluces, figurines, figurones y árboles de Navidá, porque según Don Wifredo "eso de la decoración es más cosa de mujeres". 

            

La idea d'esti añu yera otra vuelta volver a promocionar LA NAVIDÁ, poniendo dos  arcos de lluces, un árbol de navidá, el trinéu de Pá Noel trayíu de Laponia y dos elfos y elfes con ropa axustao y espetera arrogante que fadrán el papel d'azafatos y azafates de feries y congresos y pa ello rociaríen con ñeve 5G de plástico, de lo que nun enfría. Tamién contaba promocionar LA VÍA PELEGRINA. Pa esto último, l'estand va contar con una pantalla xigante onde va a proyectase LA ESPERANZA D'HISPANIA, una película que trata del aniciu de les pelegrinaciones a la tumba del Santu Matamoros nel que Don Wifredo ye'l protagonista, caracterizáu de Rei Casto.  Pa ello, contó col asesoramientu de la periodista, escritora de novela hestórica SABELA DE VITORIA qu'amás ye bederre, tufa y de dereches.  

https://www.facebook.com/profile/1816356144/search/?q=la%20esperanza%20d%27Hispania

Lo de les pareyines d'elfos y elfes nun lo acababen de ver, sobretoo la Primera Dama y el Delegáu de Dios en La Ciudá de Cuentu. La primera porque tenía miéu  de que dalguna de les elfes  enganchara a Don Wifredo col so porte de galán maduru y el segundu,  porque dicía que la ropa que llevaben,  axustao y escote arrogante, podíen envizcar al mal y al pecáu. 

Como regalu al alcalde de la Capital del Reinu, Don Wifredo contaba llevá-y media docena de MINGUFLES mercaos en LA POLLOTEKA, a lo que'l Delegáu de Dios diz : "No sé, Wifredo, igual lo toma como un insulto, además seis mingufles son muchos,  seguramente la crema pastelera se pone rancio". "Bueno, entonces le compramos trés enverde seis", dixo Don Wifredo recascáu.  Depués la PRIMERA DAMA fadría  pa repartir, unes cuantes docenes de suspiros d'aquellos que deprendió a facer gracies a la receta d'aquella señorina,  "chacha de pueblo" que tuvieron en casa, que "hablaba el bable, pero el de verdad, el auténtico". "Para meter ruido a la hora del vermú", siguió Don Wifredo, "ponemos unas gaitas  y siacaso, contratamos a Os Apabardeixos para que animen un poco por si viene Freixolo y como invitado estelar, traemos a Juan Pardo y como nota de humor a Mari Carmen y sus muñecos", dixo Don Wifredo tou resolutivu. "Wifredo", entrugó'l señor Pindio "¿Pero Os Apabardeixos y Juan Pardo no son gallegos? ¿Y Mari Carmen sigue viva?", a lo que Don Wifredo-y contestó con una carona vinagre que nun se llambe: "Tu qué sabrás, Pindio. ¡¡¡Qué más dará gallegos qu'asturianos!! Al final, todo está a un andar. Como sigas así de quisquilloso, Pindio, vas a ir en la lista con  la que fuiste en 2019 y despídete de ir conmigo de número dos", espetó Don Wifredo con un aquel desentonáu. 

Darréu d'ello, un técnicu de la Casa-Conceyu vuelve a dicir si la Primera Dama ye manipuladora d'alimentos, porque eso de qu'un particular faiga suspiros y lo reparta asina, de romería, pue trayer problemes, si a daquién-y sienten mal,  a lo que la Primera Dama toa rabisca respuénde-y "Manipuladora, nada, pero caciplona, bastante y además, bien limpia", polo que se dio por rematada la discusión y nel estand de La Ciudá de Cuentu diben a  repartise suspiros de los que fai la Primera Dama. 

Como nun podía ser d'otra manera, el chigre del estand tendría que lu llevar una empresa asociada a HOSTELERÍA MIAGONA, S.A., a lo que'l técnicu de la Casa-Conceyu,   ellí presente, retrucó que lo propio ye sacar la plaza del chigre a concursu, a lo que Don Wifredo respuende "Soy el Kiko Ledgard de la Ciudá de Cuentu y el concurso lo gana quien a mi me dea la gana", a lo que'l técnicu diz-y "¿Y quién es Kiko Ledgard, Don Wifredo". Don Wifredo quedó mirándolu con cara vinagre por nun conocer a Kiko Ledgard y pensó pa él "Joven inorante, que suerte tienes que eres funcionario y  no trabajas en L'Atalaya, sino ya te iba a decir dónde te ponía yo"

".