DE XORNAES, CONCURSOS, LLAMENTOS Y FOCICOS LLARGOS EN LA CIUDÁ DE CUENTU

Depués de la resaca de les fiestes patronales,  de l'autocomplacencia y el convencimientu de Guada, Don Wifredo,  la Primera Dama y d'Al-Miedra, representante supremu d'HOSTELERÍA MIAGONA D'ASTURIES, SA de qu'estes fueron les meyores fiestes patronales de La Ciudá de Cuentu que se recuerden, toca otra vuelta ponese a trabayar col aquel de proyéutar una imaxe dinámica, actual  y moderna de la ciudá, y de pasu, ver cómo se pue sacar réditu al traviés de la collaboración público-privada que tanto-y presta al mundu lliberal. 

Les Xornaes del Armisticiu son pa esti mes d'ochobre y hai que se poner en plan p'atacar La Ciudá de Cuentu de fabes con cóngaru, fégadu encebollao y casadielles y pa ello, Don Wifredo, la Primera Dama, el Sr. de la Quinta, conceyal de Turismu, Eventos y Eventinos y el Sr. Al-Miedra, como ye vezu, aconceyen nel reserváu de la cafetería de siempre onde'l señor alcalde suel tomar el café. Píden-y al camareru que vaya discretamente a LA MINGOTEKA y-yos traiga unos mingufles y ratufles pa moyalos col café mentanto falen qué van entamar pa les xornaes del ARMISTICIU. Dende qu'abrieron el negociu de pasteles gochos la Primera Dama yá nun prepara esos suspiros que deprendió a facer gracies a aquella señorina "de pueblo" que trabayó en ca d'ellos y que según Don Wifredo "esa sí, esa si hablaba el bable de verdad, el auténtico".

Entama la intervención el Señor Al-Mierda proponiendo que tolos bares y restaurantes qu'ufierten el Menú del Armisticiu tendrán que-y comprar el material a un conocíu proveedor, amigu d'él.  El probe ta pasándolo mal y  ye un bon empresariu que da munchos puestos de trabayu. Siguió Al-Mierda cola so intervención, onde con tonu miagón y lloramigón, tipo ex alcaldesa d'Avilés, llamentábase qu'esti añu, pesie a les bones espectatives, nun va haber personal bastante pa cubrir la demanda "y para detrás, el que hay, quiere cobrar", sentenció la Voz de la Hostelería patria, asina que siguiendo na llinia del discursu quexicón, entrugó-y a Don Wifredo sobre la posibilidá que dende la Casa Conceyu fale cola Cofradía de Los Mangantes. "¿Y qué pintan Los Mangantes en esta historia?" entrugó Don Wifredo. Entós la Primera Dama  dixo "Me parece muy buena idea". Don Wifredo nun atolenaba y entós Al-Miedra esplicó-y lo que quería dicir. "¿Los Mangantes no son los que indultan a los reos en Semana Santa?", "Sí", dixo Don Wifredo ensin abocanar. "Seguramente que conocerán a gente de esta que estuvo en la cárcel que estarán encantados de trabajar por la comida y un techo en unos barracones dónde dormir."  "Buena idea, sí señor", dixo Don Wifredo, a lo que-y amestó la Primera Dama, con un xeitu de señora de rastrillo, "Es una manera de reintegrarlos en la sociedad, pobres"

Esti añu les Xornaes del Armisticiu van durar más díes y pa que nun seya namás fartase, HOSTELERÍA MIAGONA D'ASTURIES, SA, pensó en da-y más conteníu y vistosidá a les xornaes, proponiendo'l PRIMER CONCURSU DE VESTIMENTA D'ÉPOCA, onde'l líder de los hosteleros, faciendo gala d'economía circular,  aconseya a los concursantes mercar el xéneru y los complementos pa los disfraces nel bazar de Feng Cha y de Laura Huang inauguráu hai pocos meses por Don Wifredo, nesti casu  ensin la presencia de la Primera Dama. Al Señor de la Quinta, a Don Wifredo y la Primera Dama paeció-yos bien porque ye una midida que pon a La Ciudá de Cuentu nel sieglu XXI, eso sí, pa la organización y pa que quede bien claro "nada de trajes regionales, que se vayan a Grado, que son comunistas", espetó Don Wifredo dexando al restu de los aconceyaos con cara plasmu, incluyida la Primera Dama, a lo que matizó "Y que conste que tengo mui buenos amigos en Grado y comunistas".  "¿Wifredo, por qué no nos presentamos tu y yo disfrazados de Prefecta y su esposo "El Prefecto"?"  A Don Wifredo nun-y cayó mui embaxo la propuesta. Nun yera que nun-y prestare concursar, porque él ye de los que nun-y gusta perder nin siquiera al parchís, pero lo de dir revestíu de Prefecto nun lo llevaba bien, porque yá se sabe qu'a La Prefecta dáben-y mala nota y entós el Prefecto pudiera ser vistu como un poco cornudu. "Bueno, si eso pensamos otro disfraz", dixo Don Wifredo como dexando pa prau la propuesta de revistise d'estos personaxes con tanto raigañu en La Ciudá de Cuentu". El Sr Al-Mierda, pola so parte, retrucó qu'habrár qu'escoyer un xuráu afayadizu pa estos menesteres y que pa eso habría que lo facer con discreción. Nun valía garrar a cualquiera y presentase ensin más porque los del antiguu Tridente anden al quite y too-yos paez mal. El Sr. de la Quinta propón-y  a Don Wifredo que meyor nun se presente y a lo cabero, prefier tar nun discretu segundu planu y va ser la Primera Dama la que se presente al concursu, que de xuru va ganar.  

Don Wifredo y Al-Mierda fixeron negociaciones pa que L'ARMISTICIU coincidiera colos PREMIOS SOBERANU 2022 y de pasu ufierta-yos el platu a tolos premiaos y convidaos al eventu. Al final, nun pudo ser por problemes d'axenda de los Soberanos y amás,  tanto la SOBERANA como la SOBERANA MADRE, son un poco repunantes y nun comen otru fégadu encebollao que nun seya'l  que-yos dieron nun chigre d'aquel sitiu que ganó lo de PUEBLU AFAYADIZU 2007, que taba onde la plaza. 

Al final, aportaron les XORNAES DEL ARMISTICIU y, dempués de dos años de seca, la xente tenía ganes de salir y munchos de los bares, chigres y restoranes tuvieron que poner que yá nun había menú. Les previsiones más optimistes quedaron curties y aparte de facer caxa, el Primer Concursu de Traxes d'Época foi un ésitu de participación, concursando hasta la Primera Dama revistida de La Prefecta. Eso sí, Don Wifredo nun participó y al pesar que taba mui contenta col traxe y complementos que-yos mercare a Laura Huang y a Feng Cha, ella encaprichárase con un xéneru que viera colgáu nun de los talleres de La Llera y que taba teñíu con tintes naturales. Pidía-y a Wifredo que quitare una sabanona d'aquelles, que total naide diba dase cuenta. Al final nun pudo ser, pero'l matrimoniu chinu formáu por Laura Huang y Feng Cha fíxo-y bon preciu n'agradecimientu pola asistencia de Don Wifredo al actu d'inauguración del bazar. 

De toles maneres, anque les xornaes fueron un éxitu, los llamentos y los focicos nun tardaron en llegar. D'un llau, Al-Mierda llamentábase de que'l tiempu tuvo demasiao buenu, fixo muncho calor, y que si tuviera un poco más frío, de xuro diben tener entá muncha más xente y podía sacase más tayada; amás d'ello, los trabayadores eventuales de la hostelería que contrataron gracies a la Cofradía de los Mangantes nun se conformaben col agospiu y la comida, queríen cobrar  y pa detrás, un par de palombes descaraes posáronse na mesa onde taba xintando 'l Delegáu del Nuestru Señor en La Ciudá de Cuentu,  y a cuenta d'un cachu cóngaru abiertu ente les fabes, engarriáronse, metieron el picu nel platu y el Delegáu quedó ensin comer y la camisa negra del Sr Delegáu echada a  perder, enllena de llamparones de fabes. Del otru llau, la Primera Dama taba enfocicada porque'l traxe de Prefecta nun quedó ente los trés primeros clasificaos. "Tengo a la muyer remontada", dixo Don Wifredo, como quitándo-y fierro al asuntu, anque taba un poco resquemáu porque-y espetó  en medio de tol mundu "Qué alcalde eres tu, que prefieres que el premio lo gane otra señora a que lo gane tu mujer."

Daba la casualidá que la ganadora del Concursu foi una señora que-y entamó un Mercáu en L'Atalaya del que guarda mui mal recuerdu,  porque les vaques, oveyes y pollinos que se llevaron pal eventu, cagaben y munchos socios, como nun sabíen qué yera aquello,  pisaben les moñiques y cagayones pa disgustu d'ellos. Pa detrás, por si fuera poco, hubo figurantes, mercaderes, titiriteros y saltimbanquis que se bañaron na piscina, faciendo que munchos socios salieren espavoríos del recintu y col focicu torcíu.