SORBER XELU

 DE SAN MATEO A SANOTEA

"Fredi, que los desalojen, que los desalojen" 

De nenu San Mateo yera baxar a les barraques o dir a ver les carroces del Día América. D'estudiante y yá de paisanu fechu y derechu,  San Mateo son les últimes boquiaes d'esi branu que nun quier marchar;  un retrasar les coses énte un futuru próximu, como'l del estudiante que depués de terminar los estudios nun sabe cómo encarar el futuru ya intenta prolongar esa dómina d'estudiante feliz y sobretoo,  ye SORBER XELU. 

 

Teo que dicir qu'esta espresión nun ye mía, sacóla la mio amiga Elenía allá pel añu 2000 una vez que tábemos en plenes fiestes de San Mateo tomando un combináu de raigaños caribeños atacáu de xelu granizao, la música al alto la lleva, toos col vasu de plásticu, bebiendo per una paya y mirando unos pa otros. La situación yera que por culpa la música malpenes podíemos falar y la mio amiga de mui mala hostia espetó que taba fartuca de venir a sorber xelu, que se terminó,  y que yá taba bien. Prestóme tanto la espresión que l'adopté pa min.  

Pa esti qu'escribe SORBER XELU ye San Mateo, Cascu Antiguu y chiringuitos, al marxe de lo que tomes: más nada.  Personalmente yo yera d'El Pinón y d'El Topu Fartón y,  en muncha menor midida d'El Rincón Cubano, cuando tocaba'l momentu real de SORBER XELU, pero sorbelo de verdá. Confieso qu'al Rincón Cubano diba lo imprescindible por esi aquel tan antiasturianu d'esi PCE uvieín de Rivi y de Paco de Asís. Cuando desapaeció'l Topu fui a la Mateína, la Ciudadana y  la Folixaria, que taben na Corrada l'Obispu. Eso sí, nun me dio tiempu llevantá-yos el vetu a La Guinda, porque fixi la promesa que consumiría aende cuando s'iguare l'Estatutu, cosa que cómo sabéis, nun se dio y pa detrás, desapaeciéronlu como al restu. 

                    

Esti modelu de fiesta que conocimos y que mató la Pandemia, Canteli y Cova, surdió de la mano d'Antonio Massip, alcalde d'Uviéu ente 1983 y 1991 y que vieno a terminar con un modelu anterior, pensáu pa los socios de la SOF y pal Oviedín del Alma, y non pa los vecinos d'Uviéu y/o del restu del País que baxábemos a la capital a esfrutar de les fiestes.  El modelu propuestu pa Uviéu en 1983 yera importáu de l' "Aste Nagusia" o "Selmana Grande de Bilbao", con actuaciones espardíes en distintos puntos de la ciudá, pero sobremanera dientro del Cascu Antiguu: conciertos de baldre, animación con charangues, verbenes populares y chiringuitos: una evolución de los chigres de la comisión que montaba'l movimientu asociativu cola fin de sacar unos cuartos pal restu del añu. Y si en Bilbao teníen a Mari Jaia, un personaxe creáu en 1978 y que representaba a una muyer de pueblu colos brazos p'arriba como si tuviera baillando, n'Uviéu crearon a Mateín, un personaxe de güina y paragües a la espalda, por si llovía, que venía de La Llera a Uviéu a pasar les fiestes de San Mateo y que nun marchaba hasta la Romería'l Cristo les Cadenes col que se zarraba'l ciclu festivu.   De ser un muñecu pasó a ser de carne y güesu y tuvo interpretáu pol actor del grupu teatru Margen yá fallecíu, Ceferino Cancio. Teo que dicir que pa min San Mateo foi la única cosa bona que fixo Antonio Massip. 

Fueron unes fiestes que tuvieron mui bona acoyida del públicu en xeneral, pero una reacción contraria del sector averáu al “Oviedín del Alma”, tachándoles de “chabacanas y tercermundistas” (LNE 22/09/1983).  Los chiringuitos siempre tuvieron nel puntu de mira de los sectores más rancios  y conservadores de la noble y vetusta ciudá qu’apigazaba y apigaza. El mesmu Gabino de Lorenzo, alcalde ente 1991 y 2012, nel programa electoral llevaba la eliminación de los mesmos, pero bien llueu se decató que los chiringuitos y l'animación nel Cascu Antiguu yeren una parte importante de  la fiesta que prendió na sociedá uvieína y asturiana en xeneral. Quitó verbenes na plaza de la Casa Conceyu, El Fontán, "mató" a Mateín porque en palabres d'Alicia Castro Masavéu, yera ríise de la xente de los pueblos y punxo conciertos de pagu. Sicasí, Gabino, que gobernó con mayoría "perabsoluta" nun foi quien a quitar los chiringuitos nin les actuaciones na Plaza la Catedral pesie a los llamentos de la Santa Madre Ilesia y de la hostelería miagona, a la que-y dio dalguna prerrogativa pa tenelos contentos pa que montaren terraces y dalgún chiringuitu ayenu al texíu asociativu. Ello ye eso de la collaboración "público-privada"

L'arribada  en 2019 Canteli & Cuesta, SA  y una Covadonga rabiada y revanchista al gobiernu local,  cambiando tola programación musical que l'anterior equipu de gobiernu tenía apalabrada, presentía que dalgo diba pasar coles fiestes de San Mateo y nada bono: un Carlos Baute y una Marta Sánchez, pa los paisanos y los constantes avisos de la emisaria Cova alvirtiendo de que "las fiestas son una importante fuente de ingresos para la izquierda ovetense desde hace casi cuarenta años" yera un pálpitu que'l Pinón Folixa;  El Rincón Cubano; los bocaos de  calamares del Club Ciclista de Cualloto, la Comisión de Fiestes de San Juan de La Corredoria y La Ciudadana, ente otros, teníen los díes contaos. 

La Pandemia fixo qu'hubiera ciertes actividaes nel Auditoriu y poco más,  lo que cuento que sirvió pa dar tiempu al equipu de Canteli & Cuesta con Cova d'ariete pa poner la fiesta en manes d'OTEA, Hostelería Miagona d'Asturies, una asociación con ganes de ser influyente n'Asturies al xeitu de l'antigua SOMAFIA. Ello resulta un San Mateo basáu na colocación de casetes que bien puen paecer a les d'una feria del llibru o una feria  de les flores; unes casetes ensin xixa nenguna, toes cola mesma música y ensin decoración porque yá ta ehí la Local pa quitala y onde nun cabe esi aire frescu de llibertá y reivindicativu d'El Topu, Pinón Folixa, la Folixaria o la Ciudadana (nun toi falando de Susana Fernández, diputada de la Xunta Xeneral); un ambiente que lo mesmo pue ser San Mateo o San Lorenzo, como vieno a dicir l'otru día l'Alasku nun conciertu qu'amenizó con ciertu retrasu; unes casetes onde nun se pue vender bebida con envases de más de trenta y cinco centillitros, lo que de mano, la sidra taría vetao, anque siempre cabe la ufierta "1 culín, 1 euro y 6 `culines´, 6 euros" y pa rematar,  una vuelta del palcu d'autoridaes pal Día América onde'l señor Alcalde y la Primera Dama van ver en primera fila les carroces mentanto pasen pela cai Uría. 

 Un pregón qu'arrincaba con un desfile que salía d'El Reconquista a la Plaza'l Conceyu con músicos, Telva y Pinón de xigantes y cabezudos y tamién unos Telva, Pinón y Pinín de carne y güesu, qu'en 2019, de manera revanchista quitaron d'un plumazu, pesie a que los xigantes son de la SOF, en manes d'un señor con apellíu compuestu, mui del Oviedín del Alma. Un pregón  protestón y reivindicativu que nun-y fai gracia a Don Alfredo, diciendo que "es cosa de cuatro personajillos que no representan ni a Oviedo ni a nadie" y una Covadonga nerviosa pidiéndo-y a un tal Fredi, nun falamos d'Alfredo Canteli, "que los desalojen, que los desalojen"