LES DOS CARES DEL VENTISIETE DE SETIEMBRE

 

"La Romería" y "Al Alba" son dos canciones que formen parte de la banda sonora de mio vida y que me vienen acompañando dende aquellos años de l'adolescencia y post adolescencia hasta güei y que vienen a ser, d'una mano, la cara allegre, prestosa y folixera y per otru llau la cara dura y amarga d'un mesmu día.

"La Romería" yera'l ramu a trés meses abundantes de vacaciones, que col pasu del tiempu foi adelantándose a San Mateo. Aquellos primeros años, les clases nel institutu y la facultá pincipiaben n'ochobre y la Romería yera esi bocadillu que me facía mio ma; garrar el tren hasta Figareo y d'ehí dir andando hasta Santuyano, El Pedroso y Cuna, onde garrábemos fuelle pa subir a Insierto, ello ye, "la empinada cuesta para subir a la ermita", como canta'l de Mieres, y mentanto xubíemos, dir parando nos puestos onde vendíen sidra dulce, y onde nún d'ellos atopaba a Cándido y Maruja, unos vecinos de Les Colomines, qu'en realidá yeren más que vecinos, casi de la familia, vendiéndolo por vasos, ¡ A 20 pesete! Llegábemos a Insierto y de la que buscábemos un cachu prau onde se sentar y comer esi bocadillu, siempre mos xuntábemos con más xente de Morea, davezu mayores que yo, too ello mui tribal, mui de clan, colos que malpenes me trataba por custiones d'edá. Comíemos esi bocadillu, comprábemos sidra y pasábemos la tarde hasta baxar al escurecerín al Prau Socueto, onde facíen el baille hasta les 10 de la nueche. Daquellos años escurecía primero porque'l cambéu d'hora yera l'últimu fin de selmana de setiembre, non n'ochobre como vien siendo dende 1996 a esta parte. A les 10 de la nueche paraba la orquesta pa cenar y una riá de xente baxábemos pela mesma carretera pela que xubiéramos pela mañana pa garrar l'últimu tren en Figareo y que llegaba a Morea a les diez y media la nueche..

"Al Alba" ye la cara dura y amarga d'esti día; la canción que recuerda qu'hai 48 años, un dictador asesín, dando les caberes boquiaes, col envís d'amosar fuerza y poderíu, y desoyendo toles voces, hasta la del mesmu Pablo VI, colo católicu, apostólicu y romanu que yera, firmó sentencia de muerte contra cinco rapazos opositores al réxime. Una condenes a muerte que tendríen llugar n' Hoyo del Manzanares (Madrid), Burgos y Barcelona al riscar del 27 de setiembre, ello ye, "Al Alba"

Si te dijera amor mío

que temo a la madrugada

no sé qué estrellas son estas

que hieren como amenaza

dicen que canta la luna

al filo de su guadaña

Presiento que tras la noche

vendrá la noche más larga

quiero que no me abandones

amor mío, al alba.

...

En tiempos de ñubes prietes y gafes qu'amenacen tempestá y escuridá ye menester tener memoria, memoria y namás que memoria pa nun cayer nos mesmos errores.