FACER PAÍS: LA RUTA'L QUESU Y LA SIDRA

 

Una idea que va camín de los 25 años, que surdió namás con abrir la ventana casa y ver lo qu'hai alredor: el pueblu onde viven, nesti casu Asiegu (Cabrales).  Depués hai que pasar a llimpio la idea y, eso sí, va llevar trabayu y  de xuro, que dalgún dolor de cabeza qu’otru. Una idea que se fai dende’l respetu y en ver el potencial que tien el mediu que t’arrodia, ello ye, lo qu’en pedante se diz “poner en valor”.  Una manera de vivir del turismu de manera respetuosa y espardiendo’l poderíu qu’ufierta la tierra na que vives, como ye la Ruta’l Quesu y la Sidra, onde t’espliquen los procesos d’ellaboración d’estos productos reis del sector agroalimentariu asturianu y que remata, como nun podía ser d’otra manera, con una espicha onde s’ufren ente otres coses, los productos en custión: el quesu Cabrales y la Sidra del Llagar de Pamirandi.

Aparte d’ello, aprovechar un negociu familiar y convertilu  nun restaurante con productos del País, de calidá y ganadería propio,  con una preparación bien cuidada y con una perbona relación calidá-preciu, amás de poner especial precuru pa la xente con intolerancia al gluten pa que puean disfrutar ensin miéu de les coses qu’ufierten y que vaya más allá de carnes o pación a la chapa y ensalaes. 

Manolo y Javi son d’esa xente que creyen y que ponen l’enfotu no que faen, porque amás de saber sacá-y rendimientu a la Tierra que los vio ñacer y na que viven, apurren una serie de reflexones interesantes sobre lo fecho y lo que ta por facer nun conceyu rural como Cabrales, y con munches posibilidaes, pero que podría tener más de les que tien. Echen de ver esi sentimientu de colectividá que cada vuelta torna a ser más individualista y que podía ser una solución, ente otres coses,  a un tema revesosu y polémicu como’l del llobu, ensin menester d’andar a tiros con ellos;  falen de vieyos proyectos, como la “Escuela de Productos Lácteos”, que daquella fracasaron, pero al que dándo-y una vueltina podría ser un referente; tamién-y piden un poco implicación a esa Universidá d’Uviéu, qu’a les veces vive tan d’espaldes a la realidá d’Asturies.     

Propuestes y reflexones pegaes a la Tierra y con conocimientu de causa, ensin necesidá d’estudios, informes, dossieres y dossierinos que les alministraciones encarguen a los espertos y qu'en munchos  casos acaben pigaciando en cualquier caxón d’una Dirección Xeneral esperando a que depués d’un tiempu abran esi caxón y-y quiten la cota polvo que tienen enriba.