Donan Pher y el Brigada Rivas.
Donan Pher, qu’en realidá
ye Fernando lleío del revés, yera un vendedor ambulante qu’andaba peles
villes y pueblos vendiendo bolígrafos, plumes estilográfiques, retuladores y caxes de pintures de colores,
que de xuro, xente de Morea que pasa de
los cuarenta lu recuerda de cuándo venía. El mercáu de los viernes en Morea ye
de 1981 pero Donan Pher paeció muncho antes, ello ye que los primeros recuerdos que teo d’él son de cuándo
diba a párvulos, a les escueles d’El Campu, y como daquella Morea nun tenía mercáu, podía paecer
cualesquier día. Tenía un “Gordini” y
poníase n’El Campu, pa la parte onde taben les escueles, llantaba
una sombrilla, una mesa camping atacada del xéneru que diba vender, y pa ponese
a ello, vestía traxe d’esplorador, con salacot incluyíu, qu’asina se llamen
esos cascos/sombreros que gasten nos safaris, que me recordaben a aquellos
esploradores perdíos en mitá de la selva, y que yeren recibíos con tola
hospitalidá por Jane y Tarzán naquella cabaña llantada enriba un árbol.
Amás, pa llegar a más xente, tenía un micro y un altavoz a piles y asina
ufría lotes de bolígrafos, retuladores y pintures a un preciu más que
razonable, mientres neños como yo, apetiguñábemosnos alredor d’aquella
sombrilla, porque cuando venía a Morea, pal universu d’un nenu, yera una novedá.
Al llau de la mesa tenía un espositor de semeyes onde él paecía retratáu con unos lleones y tamién con
una culiebra de les grandes, que guapamente podíen ser testigos de les espediciones del
personaxe pela selva y sabana africana. Al paecer, según pudi saber yá de
mayorín, de la mano d’un artículu bien interesante y prestosu qu’escribiera
Milio Mariño en LNE fai dellos años, les semeyes nun se sacaron n’África sinón
nel zoo de Madrid y cuento que tampoco nuna de les sos expediciones pela selva
topó con Johnny Weissmüller nin Mauren O’Sullivan, pa min los verdaderos Tarzán
y Jane, y poro, de nenguna manera tuvo na cabana que’ellos teníen enriba un
árbol en mitá de la selva, nin tampoco lu convidaron a xintar güevu d’avestruz. “El Emperador del
Bolígrafo”, Donan Pher o Fernando Velázquez López yera natural de La Pola
(Siero), cosa que tampoco quita que tuviere o non d’espediciones n’África.
“Aprovechen esta
magnífica oportunidad” , “ofrezco kilómetros de escritura” y “tengo el vicio de
vender barato” repitía y repitía “El Emperador del Bolígrafo” mentanto enriba la mesa colocaba en paralelo
dos bolígrafos, pa depués poner otros dos enriba d’ellos y hasta llegar a seis,
too ello pol razonable preciu de 30 pesetes, ello ye, a duru’l bolígrafu, y yo,
anque esto de pintar siempre se me dio
tan bien como’l futbol, miraba clisáu pa él y naguaba por una caxa retuladores
o de pintures
Coincidiendo nel tiempu, al mandu del puestu de la Guardia
Civil en Morea, taba’l brigada Rivas, al que munchos conocíen por “Pituso”, mui
famosu porque yera un gran entendíu de vinos y porque precuraba nun llevar
cuartos, o si los llevaba, debía tener un par de críes de cocodrilo d’El Nilo nos
bolsos del pantalón xusto, pa que cuando fuera meter les manes, les quexaes de los cocodrilos
exipcios entraren n’acción. Podemos poner la mano en fuéu y nun la quemar de que’l
Brigada Rivas podía bien colo arrogante. Lo del alcuñu de “Pituso”, como nun podía ser
d’otra manera, vien de la conocida marca de gaseosa y tien que ver cola so
afición, o más qu’afición, metedura pol vinu. Paez ser que tuvo un achaque
d’estos y yá que nun-y podíen quitar esi apegu pol “caldu”, si lu aconseyaron
pa que rebaxare los vasinos con un poco “Casera”. El casu ye que cuando entraba
nun d’aquellos chigres que yá nun tán: La Parrina, La Parra, Los Guajes, Casa
Pin, El Leonés… y pidía un vinu con casera, xusto de la qu’ abríen el tapón de
la botella con aquellos mecanismos d’antes y se sentía la presión del gas,
ensin que-y bautizaren el vinu, dicía “ya vale, ya vale”.
Pero amás de l’afición pol vinu, tampoco-y facía feos a la
comida. Una vez, nun chigre de la parroquia Nembra, los dueños taben dando a
los veceros la preba del samartín que fixeren díes atrás, cuando aporta’l señor
brigada, saluda y diz “que bien huele”. Naide-y entró a la conversación y
volvió a insistir, “tiene buena pinta eso, eh”,
y tanto los amos del chigre como los clientes, como yá sabíen con quién
trataben, azorronaron como que la cosa nun diba con ellos. Depués d’un cachu,
dándose por vencíu y como naide tuvo l’aquel de poné-y un platu cola preba y un
campanu, nun-y quedó otra opción que marchar
per onde vieno, y paez qu’un poco sentíu porque, casualmente, a la otra
selmana de la preba frustrada, a los del chigre llegó-yos una multa. El porqué
de la multa nun lu sé. Otra vez, nel
País de los Papúos, hubo una quema y llamaron al puestu de Morea, y asina
mientres se coordinaben de cómo l’apagar, un vecín ufrío-yos un poco de chorizu
y al colar, dixo “la próxima vez que ocurra algo así, sacas un poco de chorizo
tan rico que tienes”
Poco antes de que l’autoridá colare de Morea taba pasiando y averóse al puestu del “Emperador
del Bolígrafu” mientres vendía y en mitá d’una d’eses oportunidaes qu’ufría por
30 pesetes 6 bolígrafos, el señor Rivas nun tien meyor cosa que dicir, “¿Y por
qué no me lo rebajas a la mitad, te los compro por 15 pesetas?”, Donan Pher,
ensin perder la calma, nin apartar el micrófonu interrumpe la ufierta de los
miles de kilómetros d’escritura y espéta-y: “¿Usted qué piensa, que yo vivo del aire? ¿Cómo pretende
que yo le venda esto a la mitad de precio? Lárguese, so gorrón, miserable”.
Al poco, yá nun supe
qué fue d’ellos: El brigada Pituso coló de Morea y como nun podía ser d’otra
manera, el día que marchaba ofreció-y a Lisardo’l de La Roza que lu ayudare a
facer la mudanza. Depués de tenelu tol
día carretando muebles peles escaleres,
dio-y nada menos que 20 duros, 100 pesetes (0,66 €) de propina. A Donan Pher perdiéra-y la pista dende que dexo de venir per Morea, precisamente cuando yá había un mercáu tolos vienres y tuvieron que pasar unos cuantos años pa que daquién colgara nel grupu "Yo también soy de Moreda" una semeya d'él, cosa que me prestó pola vida porque siempre me llamó l'atención esa idea del marketing que tenía, y qu'anque nun topara con Tarzán, Jane y Boy, ye igual, a mi prestóme y préstame esa historia y esi personaxe creáu a costafecha pa vender.
Supe, cuando entrugando a los amigos o a xente de Morea si s'alcordaben d'él cuando una amiga me mandó l'enllaz del artículu que-y dedicó Milio Mariño en LNE, en setiembre de 2013. Amás de les semeyes de la culiebra y los lleones, gracies a él, fuimos a saber que yera mui habitual de los Sanferminos, y por ello, los de Kukuxumuxu fixéron-y un homenaxe, allá pel 96, paeciendo nuna de les sos camisetes conmemoratives de la fiesta. Morrió fai casi 12 años en La Barganiza, conceyu Siero.
Comentarios
Publicar un comentario