UN ACTU FUERA DE PROGRAMACIÓN Y UNA MISS DESTRONADA (Y NACIONALIEGA)

 

DÍA DE FIESTA EN LA CIUDÁ DE CUENTU

La Ciudá de Cuentu siempres tuvo fama de ser un sitiu llorono y de la que riscaba, paecía que’l cielu taba encapotáu y que diba tar tol día asina, pero según diben pasando les hores, les ñubes taben dexando pasu a un sol que tenía la intención d’acompañar la xornada festiva del Martes de Pegarata. Esti día a Don Wifredo prestába-y pasalu en L’Atalaya, el so castiellu , la so fortaleza particular, dende ónde allarribones podía columbrar La Ciudá de Cuentu. Sicasí, dende que yera primer mandatariu, nun-y quedaba otru remediu que baxar y comer la pegarata n’El Campu, col restu los compañeros, y de xuro col Delegáu de Dios en La Ciudá de Cuentu. 

Anque había panaderíes abondes, y delles mui bones, pa mercar la pegarata, a Don Wifredo gustába-y la que facía la Primera Dama, prestába-y muncho esa masa finina qu’ella facía, que tamién deprendió  d’aquella señorina de pueblu que tuvieron en casa y que según él “hablaba el bable auténtico, el de verdad, no eso inventado”, y si pa detrás la pegarata llevaba esi chorizu de casa que tolos años-y regalaba un xardineru de L’Atalaya por buscá-y modo a un ñetín un poco a la buena y en madreñes nuna escuela de pagu, nun habría pegarata nel mundu que la igualare. Ye verdá que col cargu de Primera Dama diba tener menos tiempu, pero yera custión d’organizase y de buscar un güecu pa complacer a 

Don Wifredo y al restu de la comitiva que los diba acompañar na xornada festiva.  Quedaren pa xintar col Señor Pindio, la Presidenta de la Comisión de Fiestes y como non, el Delegáu de Dios en La Ciudá de Cuentu, ente otros. Tamién convidara al doble del Comisario Villarejo, aquel que foi Presidente’l País y que tuvo que lo dexar porque lu timaron unos revistíos de moros. Coincidió con él na recoyida firmes na cai Pelayo y aquello foi'l comienzu d'una bona amistá, pero pel momentu, nun-y dio rempuesta. Apautara col Delegáu de Dios que s’encargare de lo dulce, y como nun podía ser d’otra manera, compraría unes caxes de mingufles y ratufles que’l mesmu Delegáu mandare mercar nel establecimientu a un monaguillu o sacristán que tuviera a mano. Nun yera propio d’un Delegáu de Dios dir en persona a una tienda tal. Tendría toles papeletes pa dir pal infiernu de cabeza. El problema diba ser cómo comer ratufles y mingufles en Campu, énte tanta xente y los periodistes dempués de facé-yos la vida imposible a los del establecimientu de comida pardo y sobretoo, depués que’l Sr. Delegáu escomulgare a un pelegrín que comió a medies un mingufle porque-y dio un baxón de zucre. Escomulgólu por gochu y por envizcar al manfloritismu.

La Primera Dama llevaba tola mañana na cocina y depués tendría que se preparar, lo que-y diba llevar tiempu. Ella y Don Wifredo aportaríen tarde, y Don Wifredo pa disculpase diría “Ya sabéis como ye la mi muyer cuándo se mete en baño”, lo que daría pie a les rises de los carcamales y del Sr. Pindio y les torcedures de focicu de la mesma Primera Dama y de la Presidenta les Fiestes.  La Primera Dama yá diba col focicu torcíu de casa porque taba segura que’l Sr Pindio diría coles manes colgando y la Presidenta les Fiestes llevaría unes tortielles conxelaes, como otres veces que se xuntaron.

El Sr. Pindio, que tenía un olfatu mui buenu, yá sabía que Don Wifredo y la Primera Dama taben al cayer, porque de la que pasaba, la Primera Autoridá de La Ciudá de Cuentu diba dexando un rastru a Varón Dandy que valtaba. Quiciabes foi’l golor de la colonia “vintage” lo qu’espertó a los 20, 22 o 24 “que son los mismos que protestan por todo”,  que xusto fueron onde taba comiendo “El mui Leal, Noble y Beneméritu Equipu de Gobiernu” de La Ciudá de Cuentu  p’ameniza-yos la mañana. Ente ellos, taba una conceyala d’El Tridente a la que-y gustaba torturar a los sos rivales poniendo-yos “La Marcha Radetzky” al altu la lleva.

“¿Y quiénes son estos desarrapados?” entrugó la Primera Dama col focicu torcíu, col que venía yá de casa y un migayín enchipada. “¿Piden comida? ¿Protestan? ¿Qué quieren?” remató. Don Wifredo contestó-y que yeren los mesmos revoltosos de siempre, los que protesten por too y que nun quieren que La Ciudá de Cuentu seya una ciudá del sieglu XXI. “Si por ellos fuera, estaríamos todos con montera picona, madreñas, viviendo en horreos y hablando el bable”, espetó’l Señor Pindio  dándo-y asina’l parabién a Don Wifredo y asina ganar puntos pa dir con él de númberu dos. La mandarina taba maurienta tirando pa podre y poco avíu tenía aende. 

“No es momento, ni lugar para protestar. Una cosa es libertad y otra cosa es libertinaje. Me parece bien que protesten, que para eso estamos en democracia, pero que lo hagan en Pumaradas”, espetó Don Wifredo contando col parabién de tol Mui Noble, mui Leal y Beneméritu equipu de Gobiernu de La Ciudá de Cuentu, y como non, del Delegáu de Dios, que diba escontra un monaguillu que trayía un paquete envueltu con unes caxes d’unos conocíos postres con forma d’órganos sexuales rellenos de crema pastelero.

La Presidenta les Fiestes dixo que lo meyor, pa evitar estes situaciones yera trayer unos grupos de baille “regional” y una banda gaites pa que “metan ruido” como’l día “Los Premios”, a lo que Don Wifredo dixo “Tomo nota. Les preparas unas bolsas con unas pegaratas d’a ración, un refresco y fuera. Eso sí,  ni se te ocurra traerme a aquel grupo folclórico que llevé al mercao de L’ Atalaya. Vestían mui pobres, parecían portugueses y para detrás se bañaron en mi piscina y dejaron toda L' Atalaya llena de cacotas de las vacas y burros”, remató Don Wifredo cola boca llena de pegarata.