Amor de colomina
Colomines ye la forma de llamar a les barriaes feches na
dómina de Franco ente finales de los años cuarenta y finales de los sesenta del
sieglu pasáu. El nome, paez ser que vien del promotor d’estes viviendes que s’apellidaba
Corominas, y d’ehí , “Colomines”, anque tamién teo sentío otra forma quiciabes
más asturiana que ye la de Colombines/Colombina, pa referise a los bloques de
viviendes y a la vivienda en custión. El nome de Colomines gástase más nos
conceyos de la Cuenca del Caudal, o si mos ponemos un poco ridículos, lo
qu’agora los xeógrafos del CECODET y el Principado llamen “Montaña Central”,
mentanto que pa La Parte Sama (Conceyos de Llangréu, Samartín y Los Barreros
–Llaviana-) llámenles barriaes, ensin más.
Yeren unes viviendes feches pol Réxime de Franco pa lo qu'esti llamaba "productores". La palabra "obreru" nun taba bien vista y namás s'usaba p'apellidar aquel santu inventáu que se cellebraba'l Primeru Mayu, cosa que me paez un erru, porque aquel santu, carpinteru de profesión, nun yera obreru sinón que yera autónomu emprendedor. Estes cases yeren propiedá del desapaecíu Ministeriu de la Vivienda, o/y tamién de distintes empreses, nes que'l tamañu diba en función del tamañu de la familia que fuera vivir aende, o de si yeres o non afectu al Movimientu.
Como yá teo dicho delles veces, yo nací nuna colomina, en casa mio güela. Aquella casa tenía una cocina grande, porque daquella yera ónde se facía la vida; una despensa; dos cuartos y un bañu con media bañera y nella vivía mio güela María, qu'en faltando'l güelu, yera la beneficiaria de la colomina; el mio padrín hasta que casó y depués mio pá, mio ma, el mio hermanu y yo. Yera de les más pequeñes porque yo conocíles de trés y hasta de cinco cuartos, pa families numberoses y afectes al Réxime, como conseñare enantes.
Cuando falo d'AMOR DE COLOMINA, nun lo faigo pa referime a la señaldá o non señaldá qu'ún puea tener. A ver, tener, teo mui bonos recuerdos de cuándo yera neñu, pero nun los echo de ver, nin tampoco m'apitez tornar a aquella dómina del blanco y negro. Falo de les relaciones y vínculos tan estremos que surden ente'l vecindariu. Ye un tiempu en que les relaciones yeren mui estrenches, les cases apetuguñaes, les unes contra les otres, lo que facía que siquieramente hubiera puertes, anque en realidá, haber, si les había, lo que pasa que munches veces teníen puesto la llave fuera, y cuando non, un cordel engancháu a la pesllera y que pasaba per un furacu fechu na puerta, pa que cuando quixeras entrar en casa'l vecín, tirares pel cordel y asina, nun teníes que picar a la puerta, entrabes y pasabes hasta la cocina. Yera una dómina onde l'home trabaya fuera casa, davezu na mina, y la muyer en casa, lo que fai que l'AMOR DE COLOMINA surda más ente vecines que vecinos, anque tamién hai de too.
El concéutu d'AMOR DE COLOMINA, nun ye míu, ye del mio amigu Chuso, que lu aplicó pa falar d'una amiga en común y de cómo les gastaba. Yá nun hubo más entrugues, señoría. Too mui claro. Esta relación suel nacer ente dos vecines, que nun teníen por que ser de puerta con puerta, y pasu ente pasu, esa bona relación de vecindá, va convirtiéndose nuna relación mui íntima, primero ente elles, y depués, eso va espardiéndose al restu de caúna de les families; de mou qu'aporta a ser una relación con un puntín afogadiza; de tar unos en casa los otros; d'unos quedase colos neños de los otros cuando marchaben, y del revés; de candonguiar en comuña; de marchar de vacaciones xuntos y hasta contase los secretos y de saber los unos les intimidaes de los otros. Eso un día, otru y otru, hasta que de secultre tuerce la lluna y esa relación de bona amistá pincipia a arregallar per tolos hastiales, y del "quiérote, quiérote", pasamos al "puta, perputa"; a sacar los trapos sucios, les intimidaes y les miseries. Eso sí, non de manera discreta, sinón al altu la lleva.
Mentanto, los daños collaterales... Eso, son collaterales y siempre hai muertos.
Y d'esta manera
siempre anda la taza
de romandela
Comentarios
Publicar un comentario